हारेको चुनावी नतिजा आफ्नो पक्षमा पार्न हरेक उपायको सहारा लिएका अमेरिकी राष्ट्रपति डोनाल्ड ट्रम्प राजधानी वासिङ्गटन डिसीमा भड्किएको हिंसापछि आलोचनामा केन्द्रमा आएका छन् ।
ट्रम्पको प्रमाण बिहीन उक्साहटमा उनका हतियारधारी समर्थकले संसद भवनमा आक्रमण गरेका हुन् । उनीहरुले झण्डै तीन घण्टा संसद भवनमा नियन्त्रण तथा तोडफोड गरे ।
ट्रम्पले प्रमाण बिना चुनावमा धाँधलीको आरोप लगाउँदै त्यसकै कारण हिंसा भएको बताए ।
प्रहरी र प्रदर्शनकारीबिच भएको झडपको क्रममा गोली लागेर एक महिलाको मृत्यु भयो । अमेरिकी इतिहासमा बुधबारको दिन विश्वसामु ‘लाज’ को कारण बनेको भन्दै ट्रम्पको आलोचना भएको छ ।
राष्ट्रपटिका पूर्व उम्मेदवार (रिपब्लिकन) तथा सिनेटर मिट रोमिनीले राष्ट्रपति ट्रम्पका कारण हिंसा भड्किएको बताएका छन् ।
राष्ट्रपतिमा निर्वाचित भएका जो बाइडेनले ट्रम्पका समर्थकबाट जे भयो त्यो बिद्रोही गतिविधि रहेको भन्दै गम्भीर निन्दा र आलोचना गरेका छन् ।
पूर्व राष्ट्रपति जर्ज डब्लु बुसले संसद भवनमा भएको आक्रमण बिद्रोही गतिविधि रहेको भन्दै गम्भीर आलोचना गरेका छन् ।
संसद भवनमा सन् १८१४ पछि भएको यो अहिलेसम्मकै खराब आक्रमण रहेको अमेरिकी सञ्चारमाध्यमले जनाएका छन् । त्यो बेला बेलायती आर्मीले भवन जलाएका थिए ।
हतियारधारी ट्रम्प समर्थक बाइडेनको जितलाई आधिकारिकता प्रदान गर्ने सदनको गतिविधिमा अवरोध गरि नतिजा उल्ट्याउन चाहन्थे ।
हिंसात्मक गतिविधि र त्यसमा ट्रम्पले प्रदान गरेको उक्साहटका कारण उपराष्ट्रपति माइक पेन्समाथि दबाब बढेको छ । उनले मन्त्रीपरिषदको निर्णयबाट ट्रम्पलाई तत्काल राष्ट्रपतिबाट हटाउनु पर्ने आवाज उढेको छ ।
ट्रम्प र उनका समर्थकबाट भएको गतिविधिले अमेरिकी प्रजातन्त्रमाथि गम्भीर आक्रमण गरेको भन्दै तीव्र आलोचना भइरहेको छ ।
तस्बिरहरु : द न्यूयोर्क टाइम्स