संसद भवनमा आक्रमणका लागि उक्साउने आफ्नो भाषण पूर्णरुपमा उचित रहेको ट्रम्पको दाबी
अमेरिकी राष्ट्रपति डोनाल्ड ट्रम्पले संसद भवनमा हिंसात्मक आक्रमणअघि आफूले गरेको सम्बोधनको बचाउ गरेका छन् ।
आफ्ना समर्थकलाई संसद भवनमा प्रवेश गरि चुनावको नतिजा उल्ट्याउन उक्साउने गरि भाषण गरेका ट्रम्पले त्यसको बचाउ गरेका हुन् ।
गएको बुधबार आफूले गरेको सम्बोधन पूर्ण रुपमा जायज र उचित रहेको ट्रम्पले बताएका छन् ।
ट्रम्पले सो भाषणाको क्रममा आफ्ना आक्रोशित तथा हतियारसहित (केही) आएका समर्थकलाई संसद भवनमा घुस्न सुझाएका थिए । त्यसपछि ट्रम्प समर्थकहरुले तल्लो र माथिल्लो सदनको संयुक्त शत्र जारी रहेका बेला संसद भवनमा आक्रमण गरेका थिए ।
नोभेम्बर ३ मा भएको चुनावमा विजयी जो बाइडेनको जितलाई आधिकारिकता प्रदान गर्नबाट रोक्ने प्रयासमा ट्रम्पले आफ्ना समर्थकलाई उक्साएका हुन् ।
संसद भवनमा भएको हिंसामा एक प्रहरी अधिकारीसहित पाँचजनाको ज्यान गयो । तर ट्रम्पले भने सो आक्रमणका लागि उक्साउने आफ्नो कार्य पूर्ण रुपमा उचित रहेको बताएका हुन् ।
संसद भवनमा बिद्रोहका लागि उक्साएको अभियोगमा तल्लो सदनमा डेमोक्र्याटहरुले राष्ट्रपति ट्रम्पविरुद्ध महाअभियोग प्रस्ताव पेश गरेका छन् । ट्रम्पले सो कार्य हाँस्यास्पद भन्दै खारेज गरेका छन् । तल्लो सदनमा बुधबार महाभियोग प्रस्तावमाथि मतदान हुने तयारी छ ।
ट्रम्प जनवरी २० मा सत्ताबाट बाहिरिँदै छन् । जो बाइडेनले सो दिन शपथ लिएर अमेरिकाको ४६ औँ राष्ट्रपतिका रुपमा जिम्मेवारी सम्हाल्ने छन् ।
महाअभियोग प्रस्तावले देशमा ठूलो मात्रामा आक्रोश खतरा सिर्जना गरेको बताएका ट्रम्पले आफू हिंसाको पक्षमा भने नरहेको दाबी गरे ।
मेक्सिकोसँगको सीमा क्षेत्रमा निर्माण गरिएको पर्खालको केही भाग अवलोकनका लागि टेक्सास जाने क्रममा ट्रम्पले ह्वाइट हाउसमा पत्रकारलाई प्रतिक्रिया दिएका हुन् ।
गएको बुधबार संसद भवनअघि जम्मा भएको समर्थकहरुलाई सम्बोधन गर्दै ट्रम्पले संसद भवनमा मार्च गर्न भनेका थिए ।
आफ्नो भाषणलाई बंग्याएर आफू विरुद्ध प्रयोग गरिएको आरोप ट्रम्पले लगाएका छन् । तर उनकै सहयोगी, रिपब्लिकन नेताहरुसहितले ट्रम्पको भाषण आपत्तिजकन र हिंसाका लागि उक्साउने खालको रहेको भन्दै निन्दा गरेका छन् ।