सेयर विवादमा भिनाजुको हत्या गर्ने सालो पक्राउ

जनकपुरधाम– सेयरको विवादमा भिनाजुको हत्या गरेको आरोपमा पक्राउ परेका सालोलाई प्रहरीले सार्वजनिक गरेको छ । पक्राउ पर्नेमा धनुषाको क्षिरेश्वरनाथ नगरपालिका वडा नं. ७ दुर्गा टोल बस्ने ३५ वर्षीय निरज खाती रहेको धनुषाका प्रहरी उपरीक्षक प्रकाश रानाभाटले जानकारी दिए ।

शनिवार जिल्ला प्रहरी कार्यालय धनुषामा आयोजित पत्रकार सम्मेलनमा खातीलाई सार्वजनिक गरिएको हो ।

गत माघ १३ गते राति धनुषाको क्षिरेश्वरनाथ नगरपालिका वडा नं. ७ स्थित रहेको क्षिरेश्वर डिष्टिलरीका संचालक उदयपुर जिल्लाको त्रियुगा नगरपालिका वडा नं. ७ का ५४ वर्षीय प्रमोद रेग्मी आफु सुत्ने कोठामा मृत फेला परेका थिए ।

२ नं. प्रदेश प्रहरी कार्यालय जनकपुरधाम र जिल्ला प्रहरी कार्यालय धनुषाबाट खटेको प्रहरी टोलीले अनुसन्धान गर्दा आफ्नो सहोदर सालोले हत्या गरेको खुलेको प्रहरी उपरीक्षक रानाभाटले बताए । खातीले सेयर लगानी सम्बन्धित विषयमा रिसइवी राखि आफ्नो भिनाजुलाई अत्याधिक मादक पदार्थ सेवन गराई बाँसको लाठीले टाउकोमा प्रहार गरी हत्या गरेको रानाभाटले बताए ।

माघ ३०, २०७७ मा प्रकाशित
प्रतिक्रिया दिनुहोस्