एकैदिन १ लाख ४३ हजार ज्येष्ठ नागरिकले लगाए कोरोना विरुद्धको खोप

काठमाडौँ- सरकारले आइतबारदेखि ६५ वर्षमाथिका नागरिकका लागि कोभिड १९ विरुद्दको खोप अभियान सुरु गरेसँगै पहिलो दिन देशभरका १ लाख ४३ हजार १४२ जनाले कोरोना विरुद्धको खोप लगाएका छन्।

स्वास्थ्य तथा जनसंख्या मन्त्रालयका अनुसार आइतबार बिहान साढे १० बजे त्रिवि शिक्षण अस्पतालमा प्रधानमन्त्री केपी शर्मा ओलीले खोप लगाएसँगै ६५ वर्ष माथिका ज्येष्ठ नागरिकलाई खोप लगाउन सुरु गरिएको हो।

स्वास्थ्य सेवा विभागको बाल स्वास्थ्य तथा खोप शाखाका प्रमुख डाक्टर झलक गौतमले दोस्रो प्राथमिकतामा परेकाहरुका लागि सुरु गरिएको खोप अभियानको पहिलो दिन साँझ ६ बजेसम्म २ हजार ९३ वटा खोप केन्द्रबाट १ लाख ४३ हजार १४२ जनाले खोप लगाएको बताए।

यस्तै सरकारले प्रतिदिन २ देखि ३ लाख जनालाई खोप लगाउने लक्ष्य लिएको छ। यता, आइतबारदेखि १० दिनसम्म ६५ वर्ष माथिका ज्येष्ठ नागरिकलाई खोप लगाइसकेपछि ११ औं दिनदेखि ५५ देखि ६४ वर्षसम्मका नागरिकलाई खोप दिइने सरकारको तयारी छ।

तर हिमाली जिल्ला तथा उच्च पहाडी भेगको हकमा खोपको उपलब्धताको आधारमा ५५ वर्ष माथिका सबैलाई खोप लगाउन थालिएको स्वास्थ्य तथा जनसंख्या मन्त्रालयले जनाएको छ ।

खोप अभियानमा १५ हजार स्वास्थ्यकर्मीलाई खटाइएको छ।

फाल्गुन २३, २०७७ मा प्रकाशित
प्रतिक्रिया दिनुहोस्