डेढ वर्षदेखि पर्यटकीय होटेल बन्द, ब्यवसायी मर्कामा

सिमकोट-मानसरोवर कैलाशको कारण फस्टाउने क्रममा रहेको हुम्लाका पर्यटकीय होटेलहरु डेढ वर्षदेखि बन्द रहदै आएका छन्।

पहिलो छ महिना हिमपातले बन्द रहेका होटेलहरु त्यो संगै कोरोना संक्रमणको कारण मानसरोवर कैलाशको सिजन सुरु नभएपछि त्यसयता पनि बन्द रहदै आएका हुन्।

गत बैशाख महिनाबाट कोरोना संक्रमणको त्रासले बन्द रहेको मानसरोवर कैलाशको धार्मिक यात्रा बन्द रहँदा हुम्लाका पर्यटकीय होटेलहरु डेढ वर्षदेखि बन्द रहदै आएको होटेल संघ हुम्लाका अध्यक्ष मिम बहादुर लामाले जानकारी दिए।

होटेल लामो समय बन्द रहदा ब्यबसायी पनि मर्कामा परेका हुन । पर्यटक आगमन सुरु भएको तीन वर्षपछि कोरोना संक्रमण आएको कारण होटेलमा लगानी गर्नु भएका होटेल ब्यबसायी सबै डुबेका अबस्था रहेको छ । मानसरोवर कैलाशका लागि आउने धार्मिक पर्यटक संख्या बढ्दै जाँदा सिमकोट र हिल्सामा डेढ दर्जन पर्यटकीय होटेल नयाँ निर्माण भई संञ्चालनमा आएका थिए।

अधिकांश होटेल ब्यबसायीले बैंकबाट कर्जा निकालेर होटेल निर्माण गरेको कारण अहिले बैंकको ब्याज तिर्न पनि कठिन भएको होटेल व्यवसायी रिन्जीन लामाले जनाए । २०७६ सालको असोजयता बन्द रहेका होटेलमा लगाएका तालामा खिया लाग्ने अबस्था रहेको सृजना भएको छ।

अब ब्यबसाय छोड्ने वा के गर्ने भन्नेमा ब्यवसायीलाई द्विविधा सृजना भएको छ । होटेल नचल्ने देखिएपछि कतिपय होटेल ब्यवसायी बन्द गरेर अन्य पेशाको खोजीमा समेत लाग्नु भएको छ।

केही होटेलले कुरुवा राखेर पर्खेर बस्नु भएको छ भने धेरैले बन्द नै गरिएको छ । पर्यटकीय सिजन सुरु हुँदा तीस देखि डेढ करोडसम्म कमाई गर्ने सिमकोट र हिल्साका होटेल ब्यवसायी हाल हायल कालय अबस्थामा पुगेको छन् ।

फाल्गुन २४, २०७७ मा प्रकाशित
प्रतिक्रिया दिनुहोस्