बाँकेमा काेराेना

डाक्टरको त्यो गुहार सुनिदिएको भए…

नेपालगञ्ज – बैशाख ३ गते। जिल्ला प्रशासन कार्यालय, बाँकेको माथिल्लो हल। प्रमुख जिल्ला अधिकारी, जिल्ला समन्वय समितिका संयोजक, सुरक्षा प्रमुखहरु र आठमध्ये ६ वटा पालिकाका प्रतिनिधिको उपस्थितिमा बैठक चल्दै थियो।

बैठकमा भेरी अस्पताल, नेपालगञ्जका सुपरीटेन्डेन्ट (मेसु) डा. प्रकाश थापा र डा. पारस पाण्डे आक्रामक रुपमा प्रस्तुत भइरहेका थिए। दुई डाक्टरले दोहोर्‍याई, तेहर्‍याई भन्दै थिए, ‘छिटो मान्छेको मुभमेन्ट रोक्नु पर्‍यो। विरामीको चाप बढ्यो। धान्न नसकिने अवस्था आउन थाल्यो।’

डाक्टरद्वय हतास मुन्द्रामा थिए । त्यो दिन उनीहरुको कुराको सुनुवाई नै भएन भन्दा हुन्छ। खजुरा गाउँपालिकाका अध्यक्ष किस्मतकुमार कक्षपतिले तत्कालै लकडाउन गरिहालौँ भन्नेबाहेक अरुले खासै जोड गरेनन्। केहीले व्यवसाय चौपट हुन्छ भन्न थाले। भर्खरै जिल्लामा आएका प्रमुख जिल्ला अधिकारी शिवराम गेलालले त्यो दिन डाक्टरद्वयको भनाइको गम्भीरता बुझेनन्, वा बुझ्न चाहेनन्।

जिल्लामा आएको दुई दिनमात्रै भएकाले होला, प्रमुख जिल्ला अधिकारी गेलाल रणभुल्लमै थिए । भन्दै थिए, ‘आउने बित्तिकै मैले कसरी लकडाउन गरौँ? केही दिन पर्खौँ, अवस्था हेरौँ।’

बैठक सकियो। कुनै निर्णय भएन। बैशाख २ गतेसम्ममा मृतकको संख्या ५९ थियो। २ गतेको पछिल्लो हप्तामात्रै ३ सय ६६ जना संक्रमित थपिएका थिए। भेरीमा ३५ जनाको उपचार भइरहेको थियो। त्यो दिनको डाक्टरको सल्लाहलाई प्रमुख जिल्ला अधिकारीले मानिदिएको भए, अलि पहिले नै संक्रमणको चेन ब्रेक हुन सक्थ्यो कि? जुन सल्लाहलाई प्रमुख जिल्ला अधिकारीले ९ गते आएर मान्नु पर्‍यो।

अर्थात, ९ गते रातीदेखि नेपालगञ्ज उपमहानगरपालिका क्षेत्रमा निषेधाज्ञा लागु गरियो। यतिबेला सम्ममा संक्रमित एक हजार दुई सय ६६ जना पुगेका थिए भने मृतकको संख्या ६७ पुगेको थियो। नौ गतेदेखिको नेपालगञ्जभित्रको निषेधाज्ञाले थेग्न नसक्ने अवस्था आयो। जिल्लाभरीकै मुभमेन्ट रोक्नु पर्ने भयो। डाक्टरद्वयले गम्भीरतापूर्वक आग्रह गरेको कुरा सोमबार राती १२ बजेदेखि कार्यान्वयनमा आउँदैछ।

स्थानीय प्रशासनले सोमबार रातीदेखि २० गते रातीसम्म जिल्लाभरी नै निषेधाज्ञा जारी गरेको छ। यो निषेधाज्ञा वैशाख ३ गते नै गरिदिएको भए, यस्तो भयावह अवस्था आउदैनथ्यो कि? सम्बद्ध अधिकारीहरु नै भन्छन्, ‘मान्छेको मुभमेन्ट रोक्दा नै संक्रमण न्यूनीकरण हुन्छ ।’

बाँकेमा अहिलेसम्म ८७ जनाको मृत्यु भइसकेको छ। दुई हजारभन्दा बढी संक्रमित छन्। त्यो दिनको बैठकमा बसेका बीचमा कुराकानी चल्छ, त्यो दिन हामीले भनेको कुरा सुनिदिएको भए यत्तिको भयावह अवस्था आउँदैनथ्यो।

बाँकेको यही ढिलाईलाई हेरेर बर्दिया जिल्लाले २ सय ७० जना संक्रमित पुग्दा नपुग्दै मुख्य–मुख्य बजार क्षेत्रमा निषेधाज्ञा जारी गरेको छ। फोकलपर्सन नरेश श्रेष्ठ भन्छन्, ‘बाँकेले निषेधाज्ञा जारी गर्न ढिलाई गरेका कारण अवस्था भयावह भएको हो । हामीले बेलैमा निषेधाज्ञा जारी गरेका छौँ।’

बैशाख १३, २०७८ मा प्रकाशित
प्रतिक्रिया दिनुहोस्