पत्रकार रोमनलाई यातना दिइएको हुन सक्ने चिन्ता, बेलारुसमाथि दबाब बढ्दो
विमान डाइभर्ट गरेर बेलारुसले नियन्त्रणमा लिएका पत्रकारका पिताले आफ्नो छोरालाई यातना दिइएको हुन सक्ने भन्दै गम्भीर चिन्ता व्यक्त गरेका छन् ।
२६ वर्षका पत्रकार रोमन प्रोतासेविकलाई ग्रिसबाट लिथुवानियाका लागि उडेको विमान डाइभर्ट गरि बेलारुसले नियन्त्रणमा लिएको हो ।
विमानमा बम रहेको हुन सक्ने भन्दै आइतबार विमान मिन्स्क डाइभर्ट गरिएको भए पनि कुनै बिस्फोटक पदार्थ भेटिएको थिएन । मिन्स्कमा पत्रकार रोमनलाई नियन्त्रणमा लिएपछि विमानलाई गन्तव्य तर्फ जान दिइएको थियो । पत्रकारलाई नियन्त्रणमा लिनका लागि बेलारुसले रायनएअरको विमान ‘हाइज्याक’ गरेको आरोप पश्चिमा देशले लगाएका छन् ।
सोमबार अबेर पत्रकार रोमनको भिडियो सार्वजनिक गरिएको छ । त्यसमा उनले आफ्नो स्वास्थ्य राम्रो रहेको र बेलारुस सरकारले लगाएको अभियोग स्वीकार गरेका छन् ।
तर अभियन्ता, बेलारुसका मुख्य विपक्षी दलका नेतासहितले रोमनलाई दबाबमा पारेर अपराध स्वीकार गर्न लगाइएको भन्दै आलोचना गरेका छन् ।
पत्रकार रोमनका पिता दिमित्री प्रोतासेविकले सोमबार रोयटर्स, बिबिसीसहितका अन्तर्राष्ट्रिय सञ्चारमाध्यमसँग आफ्नो छोरामाथि गम्भीर यातना भएको हुन सक्ने भन्दै चिन्ता व्यक्त गरेका छन् । उनले युरोपियन युनियनसहित अन्तर्राष्ट्रिय समुदायसँग आफ्नो छोराको रिहाईका लागि दबाब सिर्जना गर्न अपील गरेका छन् ।
अमेरिकी राष्ट्रपति जो बाइडेनले पत्रकार रोमनको रिहाइको माग गर्दै विमान डाइभर्ट घटनाको निन्दा गरेका छन् ।
डाइभर्ट गरिएको विमानमा १७१ यात्रु थिए। द नेक्स्टा ग्रुपका पूर्व सम्पादक रोमन प्रोतासेविकलाई नियन्त्रणमा लिएपछि विमानलाई गन्तव्य तर्फ उडान गर्न दिइएको थियो।
झण्डै सात घण्टा ढिला गरि विमान आफ्नो गन्तव्य लिगुवानियाको राजधानीमा अवतरण हुन पाएको थियो।
