कास्कीका प्रहरी प्रमुख श्रेष्ठ भन्छन्- निषेधाज्ञामा हिँडेकाले गणेश लामालाई नियन्त्रणमा लिइएको हो

गणेश लामा। फाइल तस्विर

काठमाडौं- कास्की प्रहरी प्रमुख जिवनकुमार श्रेष्ठले निषेधाज्ञाका बेला हिँडेकाले चर्चित गुन्डा नाइके गणेश लामालाई नियन्त्रणमा लिइएको बताएका छन्।

वडा प्रहरी कार्यालय बैदामको टोलीले लामालाई नियन्त्रणमा लिएको हो। श्रेष्ठले लामा अहिले वडा प्रहरी कार्यालय बैदाममै रहेको बताए।

‘ निषेधाज्ञाको समयमा  हिँडेको पाइएपछि प्रहरी कार्यालयमा ल्याएर सोधपुछ गरिएको हो’, श्रेष्ठले भने। यता वडा प्रहरी कार्यालय बैदामकी प्रमुख चिनिमाया तामाङले सवारी चेकिङका क्रममा लामासँग बुधबारको मात्र पास भेटिएपछि कार्यालय ल्याएर बुझ्ने काम भइरहेको बताए।  प्रदेश-४ का सांसद दीपक मनाङ्गेलाई मुख्यमन्त्री पृथ्वी सुब्बा गुरुङले बिहीबारका लागि तय भएको  विश्वासको मतमा अनुपस्थित गराउन लामाको भूमिका रहेको आरोपमा प्रहरीले उनलाई ‘माथीको आदेश’मा नियन्त्रणमा लिएको बुझिएको छ।

मनाङ्गे बुधबार मुख्यमन्त्री गुरुङलाई मत नदिने भन्दै बेपत्ता भएका थिए। बिहीबार विश्वासको मत गुमाएपछि गुरुङको सरकार ढलेको छ।

जेठ २७, २०७८ मा प्रकाशित
प्रतिक्रिया दिनुहोस्