कोभिड अस्पतालका चिकित्सक र कर्मचारीमाथि हातपात

चरिकोट– दोलखाको तामाकोसी गाउँपालिका–४ मालुमा सञ्चालित मालु कोभिड अस्पतालका चिकित्सक तथा कर्मचारीमाथि गत राति हातपात भएको छ।

राति १२ बजे स्थानीय केही युवाले मदिरा सेवन गरेर अस्पताल प्रवेश गरी डा रोविश कार्की र कार्यालय सहयोगी टोपहादुर मिजारलाई हातपात गरेको वडा नं ४ का वडाध्यक्ष होमबहादुर श्रेष्ठले बताए।

गाउँपालिका अध्यक्ष ईश्वरचन्द्र पोखरेलका अनुसार अस्पताल परिसरमा प्रवेश गरी कोभिडबाहेक अन्य बिरामीको समेत उपचार गर्न दबाब दिँदै चिकित्सकमाथि हातपात भएको थियो।

बन्द ढोका नाघेर प्रवेश गरेका ती युवालाई अस्पतालमा कोरोनाका बिरामी रहेको कारण भित्र प्रवेश नगर्न भनेको र केही समस्या भए आफूले कोभिड बिरामीभन्दा छुट्टै परीक्षण गराउने बताउँदा पनि एक्कासि आफूमाथि हातपात गरेको डा. कार्कीले बताए।

चार युवाले आफूहरूमाथि हातपात गर्न थालेपछि चिकित्सक तथा कर्मचारी भागेर बसेको जनाइएको छ। अभियुक्त तीन जनालाई प्रहरीले नियन्त्रणमा लिएको छ।

प्रहरीले मालुका गोपाल तिमिल्सिना, रोशन पोखरेल र विजुले नेपालीलाई नियन्त्रणमा लिएको छ। घटनाका विषयमा अनुसन्धान भइरहेको र कानुनअनुसार कारबाही गरिने दोलखाका प्रहरी प्रमुख भेषराज रिजालले बताए।

असार १३, २०७८ मा प्रकाशित
प्रतिक्रिया दिनुहोस्