हाइकु केन्द्रको वार्षिकोत्सवः अन्तर्राष्ट्रिय वाचन सहभागिता

काठमाडौँ – नेपाल हाइकु केन्द्र (नेहा)को आठौँ वार्षिकोत्सवका उपलक्ष्यमा आइतबार अन्तर्राष्ट्रिय हाइकु वाचन कार्यक्रम सम्पन्न भएको छ।

नेपालबाट बमबहादुर जिताली, श्याम रिमाल, मित्रबन्धु पौडेल, शिरोमणि दवाडी, गुप्तबहादुर श्रेष्ठ, किरण पौडेल, ऋषि बराल, महानन्द ढकाल, बद्री ढकाल हीरामणि, छविलाल खड्का, सुमी लोहनी, सुष्मा मानन्धर र चन्द्रावती अधिकारी तथा जापानबाट प्रकाश पौडेल माइला र सुष्मा ओमाता, दक्षिण कोरियाबाट प्रमोद सारङ, नर्वेबाट रामकुमार पाँडे, बेलायतबाट कृष्ण बजगाईँ र इजरायलबाट कमला भण्डारीले जुममार्फत वर्षा, मातापिता र गुरु, जन्मभूमि, राजनीतिक विकृति, हाइकुको बखान, बन्दाबन्दी, समुद्र, शिवपुरी आदि विषयमा नेपाली र अंग्र्रेजी भाषामा आआफ्ना हाइकु वाचन गरेका थिए। साहित्यकार बमबहादुर जिताली र सुमी लोहनीले भने लय हालेर हाइकु वाचन गरे।

हाइजिन दवाडीले कार्यक्रम संयोजन र मित्रबन्धुले प्रविधि संयोजन गरेको सो कार्यक्रममा केन्द्रका अध्यक्ष प्रा पाँडेले जापानमा आयोजित दशौँ विश्व हाइकु सम्मेलन(सन् २०१८) र कोरियामा हालै आयोजित हाइकु वाचनमा संस्था जोडिन पाएको, अन्तरराष्ट्रिय जर्नलमा नेपाली हाइकु प्रकाशन भएको, निकट भविष्यमा दुई हाइकु कृति अंग्रेजीमा आउने भएको, दुर्गम क्षेत्रका हाइजिनलाई पनि समावेश गरिने र तालीम पनि दिइने बताए। उनका अनुसार कोरोना महामारी अन्त्य भएमा सन् २०२१ मा नेपालमा हाइकु सम्मेलन गरिनेछ।

उनले साधनासहित गुणस्तरीय हाइकु लेखनमा पनि जोड दिए। उपाध्यक्ष मित्रबन्धुले संस्थाले स्थलगत हाइकु लेखन र वाचन, प्रशिक्षण, कोठेगोष्ठी तथा प्रकाशनका काम पनि गर्दै आएको जनाउँदै हाइकुका माध्यमबाट अन्तरराष्ट्रिय रूपमा जोडिन पाएकामा खुसी व्यक्त गरे।

अन्तर्राष्ट्रिय नेपाली समाजका अध्यक्ष तथा केन्द्रका अन्तरराष्ट्रिय संयोजक प्रकाश माइलाले हाइकुको अन्तर्राष्ट्रियकरणमा जोड दिए भने समकालीन नेपाली साहित्यका अध्यक्ष कृष्ण बजगाईँले अंग्रेजी भाषामा हाइकु संग्र्रह र हाइकु ज्ञान समेटिएको हाते किताब प्रकाशन गर्नुपर्ने सुझाव दिए।

सो अवसरमा दिवंगत हाइकु समालोचक इन्द्र माली, हाइजिन सुवर्णराम जोशी र कोमल चित्रकारप्रति श्रद्धाञ्जली अर्पण गरियो। पाँच– सात –पाँच अक्षरमा तीन हरफमा प्रकृति, मौसम र संस्कृतिका विम्बका साथ हाइकु लेखिन्छ।

साउन १०, २०७८ मा प्रकाशित
प्रतिक्रिया दिनुहोस्