सिन्धुली – सिन्धुलीगढीमा नेपाली सेनाले निर्माण गरेको युद्ध सङ्ग्रहालयको उद्घाटनका लागि राष्ट्रपति विद्यादेवी भण्डारी सिन्धुली पुगेकी छन्।

६२ सय ७५ बर्ग फिटमा बनाइएको युद्ध सङ्ग्राहलयको उद्घाटनका लागि बुधबार राष्ट्रपति विद्यादेवी भण्डारी पुगेकी हुन्। नेपाली सेनाले झण्डै सात करोडको लगानीमा युद्ध सङ्ग्रहालय भवन र सजावटको काम गरेको हो ।

राष्ट्रपति पुग्नु अघि प्रधानसेनापति पूर्णचन्द्र थापाले योद्धाहरुको शालीक अनावरण गरेका थिए। उनले निर्माणमा भूमिका निर्वाह गर्ने सेनाका सदस्य तथा सर्वसाधारणलाई प्रशंसा पत्र पनि प्रदान गरे।

सङ्ग्रहालयमा युद्धकालीन अवस्थाका पात्रहरु, सिन्धुलीगढी युद्धको टाइम लाइन, सेनाको नजरमा युद्धको परिदृश्य, सिन्धुलीगढी युद्धका वृत्तचित्र, चरणबद्ध युद्धका चित्रहरु, तत्कालीन युद्धमा प्रयोग भएका घरेलु हतियार, युद्धकालीन हातहतियार, अंग्रेजहरुले प्रयोग गरेका तोप, नेपाली योद्धा, ब्रिटिस योद्धा, नेपाली योद्धाका कलाचित्र, मिथिला कला, बेलायतीहरुको नाममा बनाइएका स्तम्भ, युद्धकालीन शिलालेख, ऐतिहासिक दस्तावेज तथा इतिहासका पुस्तक राखिएको छ।

सिन्धुलीगढी युद्ध सङ्ग्रहालयको विसं २०७६ कात्तिक २६ गते तत्कालीन उपप्रधानमन्त्री तथा रक्षामन्त्री ईश्वर पोखरेलले शिलान्यास गरेका थिए। नेपाल एकीकरणका क्रममा विसं १८२४ अशोजमा सिन्धुलीगढीको युद्धमा काठमाडौँ कब्जा गर्न इष्टइन्डिया कम्पनीका कप्तान किनलोकको नेतृत्वमा आएको आधुनिक हतियारले सुसज्जित अंग्रेज सेनालाई बंसु गुरुङको नेतृत्वमा गोर्खाली सेनाले हराएको जानकारहरु बताउँछन्।