जति बोल नसुन्ने कान यता उता
सधैँ खोज्ने स्तुति गान यता उता।।

गुणगान गाउनु पर्ने जसो गरे पनि
नमाने हुकुम चल्छ हान यता उता।।

मिठा कुरा देख्यो कि मुख रसाउने
जिब्रो सल्बलाउँछ खान यता उता।।

सहयोग राहतको आकाशमा नजर
दुःखी आशै आशमा दान यता उता।।

खान्की गए सबै लिलाम बढाबढमा
थैली ठूला बोकेका छान यता उता।।

पढ्यो गुन्यो हातमा कागतका मुठा
ल्याप्चेले पाए आज मान यता उता।।

दलदल जताततै उम्कौँ कसो गरि
चलौँ गोडा नचल्ने जान यता उता।।

डेग नचले मेचमा ठोकिएका किला
सनासोले अँठ्याएर तान यता उता।।

फेरि पनि दैलो दैलो भैलो खेल्नु पर्ला
कहिलेसम्म देखाउने सान यता उता।।

साउन २३, २०७८ मा प्रकाशित
प्रतिक्रिया दिनुहोस्