स्याङ्जाको लसर्घा बेँसीका १५७ घरमा ‘एक घर, एक धारा’

वालिङ – लामो समयदेखि खानेपानीको समस्या झेल्दै आएका यहाँका प्रत्येक घरमा ‘एक घर एक धारा’ जडान गरिएको छ। स्याङ्जाको कालीगण्डकी गाउँपालिका–२ को लसर्घा बेँसीका १५७ घरमा धारा निर्माण भएसँगै खानेपानीको पहुँच पुगेको हो।

कालीगण्डकी गाउँपालिकाको २८ लाख २० हजार ३५९ र प्रधानमन्त्री रोजगार कार्यक्रमअन्तर्गत १० लाख गरी कुल ३८ लाख २० हजार ३ सय ५९ रुपैयाँ लागतमा खानेपानी योजना निर्माण सम्पन्न भएको खानेपानी मर्मत तथा सरसफाइ परियोजना (वास) का संयोजक भागीरथ अधिकारीले जानकारी दिए।

गाउँभन्दा दुई किमि टाढाको तातोपानी मूलबाट पानी ल्याई गाउँभन्दा माथि रहेको माझटोलमा ट्यांकी निर्माण गरी सोहीमार्फत गाउँका प्रत्येक घरमा वितरण गरिएको संयोजक अधिकारीले बताए।

मगर समुदायको बसोबास रहेको स्याङ्जाको सुदूरपश्चिम गुल्मी तथा पाल्पाको सिमानासँग जोडिएको लसर्घा बेँसीका नागरिकले स्थानीय ठाउँमा रहेका पानीको स्रोत कुवा, खोल्साखोल्सीका खानेपानीबाट तिर्खा मेट्दै आएका थिए।

‘यो योजना आउनुपूर्व कुवा र खोल्साखोल्सीबाट पानी गाग्रीमा बोकेर खानुपर्ने बाध्यता थियो,’ तातोपानी खानेपानी मर्मत तथा सरसफाइ योजनाका अध्यक्ष पदम थापाले भने, ‘त्यो पनि पर्याप्त थिएन, घण्टौँसम्म लाइनमा बस्नुपर्थ्यो, शुद्ध थिएन तर नखाई नहुने स्थिति थियो।’

घरघरमै खानेपानीको धारा जडान भएपछि जतिबेला पनि पानीको सहज पहुँच पुगेकाले पिउनदेखि गाईभैँसी तथा करेसाबारीमा पनि प्रयोग गर्न सकिने भएको अध्यक्ष थापाले बताए। प्रत्येक घरमा मिटर जडान गरिएको छ भने मर्मत तथा पानी खोल्ने बन्द गर्न दुई जना कर्मचारी राखिएको छ।

‘खानेपानी जोहो गर्न गाग्री लिएर टाढा रहेको कुवामा जानुपर्ने बाध्यता हटेको छ,’ अध्यक्ष थापाले भने, ‘घरघरै धारा जडान भएर चौबिसै घण्टा पानी आउन थालेपछि यहाँका बासिन्दालाई सहज र सुविधा भएको छ, आँगनमै पानीको पहुँच पुगेपछि स्थानीय हर्षित पनि छन्।’

स्याङ्जाको कालीगण्डकी गाउँपालिकामा खानेपानी तथा सिँचाइका लागि पानीको समस्या भएकाले गाउँपालिकाले खानेपानी तथा सिँचाइका लागि योजना अगाडि बढाइरहेको छ। केही निर्माण सम्पन्न भइसकेका छन् भने केही निर्माणको चरणमा रहेका वास संयोजक अधिकारीले बताए।

भदौ १९, २०७८ मा प्रकाशित
प्रतिक्रिया दिनुहोस्