किन भयो काठमाडौँमा भारी वर्षा ?

साेमबार आएकाे बाढीले डुबानमा परेकाे बल्खु तरकारी बजार । तस्बिर : सुलभ श्रेष्ठ

काठमाडौँ – काठमाडौँ उपत्यका र आसपासको क्षेत्रसहित बागमती प्रदेशका केही क्षेत्रमा आइतबार रातिदेखि नै भारी वर्षा भएको छ ।

जल तथा मौसम विज्ञान विभाग अन्तर्गतको पूर्वानुमान महाशाखाका अनुसार राति र सोमबार बिहान काठमाडौँ उपत्यका र आसपासका क्षेत्र तथा बागमती प्रदेशका अधिकांश स्थानमा हल्कादेखि मध्यम तथा केही स्थानमा भारी वर्षा भएको छ ।

मौसमविद् मीनकुमार अर्यालले भने, ‘आइतबार रातिदेखि बंगालको खाडीबाट आएको जलवाष्प युक्त हावा आयो, त्यसले न्यूनचापीय क्षेत्र विकास भयो । यस्तै स्थानीय वायुका कारण स्थानीय मौसमी प्रणाली विकास भयो । ती दुवैको मिश्रित प्रभावका कारण मेघगर्जनसहित वर्षा भएको हो ।’

उनले अघि भने, ‘बागमती प्रदेशका धेरै स्थानमा हल्कादेखि मध्यम वर्षा भएको छ भने केही स्थानमा भारी वर्षा समेत रेकर्ड भएको छ ।’

पछिल्लो १२ घण्टामा भक्तपुर नगरकोटमा १२२.८ मिलिमिटर वर्षा भएको छ । यस्तै काठमाडौँको सुन्दरीजलमा ८६.२ मिलिमिटर, काठमाडौँको बुढानिलकण्ठमा ७८.६, बबरमहलमा ७९.६ तथा नुवाकोटको ककनीमा ६५ मिलिमिटर वर्षा मापन भएको महाशाखाले जनाएको छ ।

काठमाडौँ उपत्यकाबाट उत्तर सिन्धुपाल्चोकको सरमथाङमा ९५.६ मिलिमिटर तथा धापमा ९५ मिलिमिटर वर्षा भएको मौसमविदले बताएका छन् ।

जल तथा मौसम विज्ञान विभाग अन्तर्गतको हावापानी विश्लेषण शाखाकी सिनियर डिभिजनल मेटेरोलोजिष्ट डा. इन्दिरा कडेलका अनुसार केही स्थानमा भारी वर्षा भएको देखिएको छ । उनले भनिन्, ‘तर यसअघि परासी, कपिलवस्तुसहितका क्षेत्रमा जस्तो ठूलो भने होइन ।

१०० मिलिमिटर वा त्यो भन्दा बढी पानी केही स्थानमा परेको देखिएको छ । काठमाडौँ विमानस्थलमा १२१.५ मिलिमिटर पानी परेको छ ।

यो वर्ष मनुसनु सुरु भएदेखि नै लगातार जस्तो पानी परेको छ । केही स्थानमा आरीघोप्टे पानी परेका कारण अप्रत्याशित रुपमा ठूलो भौतिक तथा मानवीय क्षतिका घटना भएका छन् ।

भदौ २१, २०७८ मा प्रकाशित
प्रतिक्रिया दिनुहोस्