फाइल तस्बिर।

गोरखा – नेपालको प्रसिद्ध धार्मिक गन्तव्यका रूपमा चिनिने गोरखाको मनकामना मन्दिर बुधबारदेखि खुलेको छ । कोभिड–१९ को सङ्क्रमणको जोखिमका कारण गत वैशाख २३ गतेदेखि मन्दिरमा सर्वसाधारणलाई पूजाआजा गर्न रोक लगाइएको थियो।

बुधबारदेखि भक्तजनका लागि पूजा गर्न मन्दिर खुला गरिएको मन्दिरका मूल पुजारी इन्सानबहादुर थापामगरले जानकारी दिए।

मनकामना क्षेत्र विकास समितिले मन्दिरमा सरकारले तोकेको स्वस्थ्य मापदण्डको पालना गर्ने गरी सर्वसाधारणका लागि पूजाआजा गर्न मन्दिर खोल्ने निर्णय गरेको थियो । सोही निर्णयको आधारमा बुधबारदेखि मन्दिर सर्वसाधारणका लागि खुला गरिएको उनले बताए।

‘आज बिहान नियमित रूपमा गरिने नित्यपूजा गरेर सर्वसाधारणलाई पनि पूजाआजाका लागि मन्दिरमा प्रवेश गराइएको छ’, मूल पुजारी थापाले भने, ‘पुजारी र भक्तजनको स्वास्थ्य सुरक्षालाई ध्यानमा राखेर तत्कालका लागि मन्दिर बाहिरको झ्यालबाट पूजा सामग्री पुजारीलाई दिने गरी व्यवस्था मिलाइएको छ।’

मन्दिरमा भाकल बुझाउन आउने भक्तजनका लागि बलि दिने स्थानमा समेत छुट्टै पुजारीको व्यवस्था मिलाइएको उनले बताए। चार महिनापछि मन्दिर खुला भएको पहिलो दिनमै सयौं भक्तजन पूजापाठका लागि आएको मूल पुजारी थापाले जानकारी दिए। मन्दिरमा पुग्ने भक्तजनले अनिवार्य मास्कको प्रयोग गर्नुपर्ने, सामाजिक दूरी कायम गर्नुपर्नेलगायतका व्यवस्थासमेत गरिएको उनको भनाइ छ।

यता मन्दिर परिसरमा पुग्ने भक्तजनको स्वास्थ्य अवस्थालाई मध्यनजर गरी मन्दिर परिसरमै हेल्थ डेस्कसमेत स्थापना गर्ने तयारी गरिएको शहीद लखन गाउँपालिकाका अध्यक्ष रमेशबाबु थापामगरले जानकारी दिए।

कोरोना सङ्क्रमणको जोखिमका कारण बन्द रहेको गोरखाको अर्काे प्रसिद्ध धार्मिक गन्तव्यको रूपमा चिनिने गोरखा दरबारस्थित कालिका मन्दिर पनि बुधबारदेखि सर्वसाधारणका लागि खुला गरिएको छ ।

भदौ २३, २०७८ मा प्रकाशित
प्रतिक्रिया दिनुहोस्