अनधिकृत सेवा लिएको अभियोगमा मुद्दा दायर

काठमाडौँ – अख्तियार दुरुपयोग अनुसन्धान आयोगले अनधिकृत रूपमा विभिन्न सेवा सुविधा लिएको अभियोगमा तनहुँको साविक घाँसीकुवा गाविसका तत्कालीन गाविस सचिव रामराज न्यौपानेसहित ६ जनाविरुद्ध विशेष अदालतमा मुद्दा दायर गरेको छ।

आयोगका अनुसार दसैँ खर्च परिषद् तयारी खर्च भनी अनधिकृत सुविधा लिएको, परिषद्को निर्णयबिनै आर्थिक सहायता दिएको र परामर्शदाता नियुक्तिपछि पहिल्यैदेखिको सम्झौता बनाई रकम भुक्तानी गरेको पाइएपछि गाविस सचिव न्यौपानेविरुद्ध एक लाख ४७ हजार ३६४ बराबरको बिगो दाबी गर्दै मुद्दा दायर गरिएको हो।

यस्तै, आयोगले तत्कालीन इञ्जिनियर शुकदेव अधिकारीविरुद्ध ६३ हजार ७५०, तत्कालीन योजना अधिकृत गणेश घिमिरेविरुद्ध ६३ हजार ७५०, तत्कालीन इञ्जिनियर तीर्थराज ढुंगानाविरुद्ध ७२ हजार २५० बराबरको बिगो दाबी गरिएको छ। यस्तै, लेखापरीक्षक नरहरि पण्डित र श्रीभद्र खनाललाई भने कानुनअनुसार कारबाहीको माग गरिएको छ।

यस्तै, आयोगले नदीजन्य पदार्थ उत्खनन तथा निकासीको ठेक्कामा राजश्व छली गरेको अभियोगमा नवलपरासी (बर्दघाट पश्चिम) मा कार्यरत एसआरडी कन्स्ट्रक्सन प्रोप्राइटरहरू रमेश पराजुली र सन्दीप केसीविरुद्ध ७५ लाख ८० हजार ६४९ बराबरको बिगो कायम गरी भ्रष्टाचारको मुद्दा दायर गरिएको छ।

उनीहरूले फर्जी बिल प्रयोग गरी राजश्व छली गरेको पाइएको आयोगका प्रवक्ता नारायणप्रसाद रिसालले जानकारी दिए।

भदौ २८, २०७८ मा प्रकाशित
प्रतिक्रिया दिनुहोस्