काभ्रेका चार स्थानीय तह कोरोनामुक्त

काभ्रेपलाञ्चोक – यहाँका चार स्थानीय तह कोरोना सङ्क्रमणमुक्त भएका छन्। एक नगर र तीन गाउँपालिका कोरोना सङ्क्रमणमुक्त भएका हुन्। पछिल्लो दुई दिनदेखि जिल्लामा थप सङ्क्रमण देखिएको छैन।

कोरोनामुक्त हुनेमा मण्डन देउपुर नगरपालिका तथा रोशी, तेमाल र खानीखोला गाउँपालिका छन्। चौँरीदेउराली र महाभारत गाउँपालिकामा एक/एक सङ्क्रमित रहेको जिल्लास्थित कोभिड–१९ सङ्क्रमण नियन्त्रण, रोकथाम र उपचारसम्बन्धी केन्द्र (डीसीसीएमसी)ले जनाएको छ। केन्द्रका अनुसार पछिल्लो दुई दिनदेखि जिल्लामा थप सङ्क्रमण नपाइएको हो। आइतबार २६ र शनिबार १५ सङ्क्रमित सङ्क्रमणमुक्त भएका छन्।

काभ्रेमा ६ नगर र सात गाउँपालिका छन्। जिल्लामा हाल १०१ सक्रिय सङ्क्रमितमध्ये बनेपा नगरपालिकामा ३३, पाँचखालमा १६, धुलिखेलमा १८, पनौतीमा १०, नमोबुद्धमा ११ तथा भुम्लुमा ७ र बेथानचोक गाउँपालिकामा ४ सङ्क्रमित रहेको केन्द्रले जनाएको छ।

केन्द्रअनुसार यसअघि केही दिनको केन्द्रको तथ्याङ्कले सङ्क्रमणदरभन्दा सङ्क्रमण मुक्तदर अधिक रहेको देखाएको हो। जिल्लामा हालसम्म १४ हजार ४६२ मा सङ्क्रमण देखिएकोमा १९२ को मृत्यु भएको छ। हालसम्मका कूल सङ्क्रमितमध्ये ९८ प्रतिशत अर्थात् १४ हजार १६९ सङ्क्रमणमुक्त भइसकेका छन्। गत भदौ महिनायता नगन्यदरमा सङ्क्रमितको मृत्युका घटना भएको केन्द्रको तथ्याङ्कले देखाएको छ।

जिल्ला प्रशासन कार्यालयले हाल जिल्लामा यही असोज ५ गतेसम्म १० दिन ‘मिक्स लकडाउन’ थपेको छ। कोरोना सङ्क्रमणको दोस्रो लहर सुरु भएपछि गत वैशाख २० गतेदेखि जिल्लामा निषेधाज्ञा जारी गरिएको थियो। कोरोना सङ्क्रमणदर बढ्दै गएपछि गत जेठमा विभिन्न मितिमा ८ स्थानीय तहले ‘सिल’ समेत गर्नुपरेको थियो।

असोज ४, २०७८ मा प्रकाशित
प्रतिक्रिया दिनुहोस्