मुस्ताङमा अकासियाे च्यांग्राकाे भाउ

फाइल तस्बिर

बागलुङ– दसैँ आयो कि च्यांग्राको कुरा जोडिइहाल्छ। मीठोमसिनो खाएर मनाइने चाड हो, दसैँ। एक/दुई छाक भए पनि दसैँमा च्यांग्राको मासु चाख्ने धोको जोकोहीले राख्छन्। मनले इच्छाएझैँ च्यांग्राको मासु खान सजिलो भने छैन।

दसैँका लागि च्यांग्रा लिन वर्षेनि यहाँका व्यापारी दुःखजिलो गरेर हिमालपारिको जिल्ला मुस्ताङ पुग्छन्। हप्तौँ समय र उस्तै खर्च लगाएर च्यांग्रा ल्याउँछन्। व्यापारी अम्मरबहादुर क्षत्री, महेन्द्र केसीलगायत सोमबार जोमसोम पुगेका छन्। कोही बाटोमा जाँदैछन्। भाउ महँगिएका कारण धेरै च्यांग्रा ल्याउने सोचमा व्यापारी छैनन्। ‘यस वर्ष सय/डेढ सय च्यांग्रामात्र बागलुङमा भित्रने देखिन्छ’, केसीले भने, ‘जोमसोममै च्यांग्राको मूल्य रु दश हजारसम्म बढेको छ।’

मुस्ताङमा रोज्जा च्यांग्राको मूल्य रु ४० हजारसम्म पुगेकाले यहाँ ल्याएर बेच्दा त्यसको भाउ रु ४५ हजारमाथि पुग्छ। मूल्यमा कुरा मिले बढी किन्ने नत्र पसलबाट बेच्नका लागि थोरैमात्र च्यांग्रा ल्याएर फर्कने केसीले बताए। दसैँमा च्यांग्राको मासुको अत्यधिक माग हुन्छ। केही वर्षअघिसम्म दुई हजारसम्म च्यांग्रा यहाँ ल्याइने गरेकामा अहिले त्यो संख्या एकदमै कममा झरेको छ। कोराला नाका नखुल्दा तिब्बतका व्यापारीले सहज रुपमा च्यांग्रा मुस्ताङ ल्याउन पाउँदैनन्।

स्थानीय च्यांग्रामात्र बजारमा आउने गर्छ। मुस्ताङमा पालिने च्यांग्राले मात्र बजार माग धान्दैन। च्यांग्रै कम आएका कारण मूल्य बढेको व्यापारी बताउँछन्। गत वर्ष यहाँका व्यापारीले रोज्जा च्यांग्रालाई रु २७ हजार ५०० तिरेर ल्याएका थिए। अहिले त्यो बढेर रु ४० हजारसम्म पुगेको छ। मूल्य चर्काे परेपछि कतिपय व्यापारी यसपालि च्यांग्रा किन्नै गएनन्। यहाँका २० भन्दा बढी व्यापारीले दसैँमा च्यांग्राको कारोबार गर्छन्। लामो बाटामा कठिन यात्रा तय गरेर उनीहरुले च्यांग्रा भित्राउँछन्।

अर्का व्यापारी क्षत्रीले गत वर्ष जोमसोमदेखि दुई दिनको बाटामा पर्ने चमर भन्ने ठाउँ पुगेर च्यांग्रा ल्याएका थिए। कोभिड–१९ का कारण च्यांग्राको व्यापार पनि खस्किएको क्षत्रीको भनाइ छ। ‘मूल्य बढेको थाहा पाएपछि धेरै व्यापारी च्यांग्रा लिनै गएनन्’, उनले भने। च्यांग्रा कम आउनु र बढ्दो करजस्ता कारणले पनि मूल्य महगिँदै गएको हो। व्यापारीको आउजाउमा पनि बढी खर्च हुन्छ। स्थानीय तहसहित ठाउँठाउँमा दस्तुर र कर तिर्नुपर्दा थप मर्का पर्ने गरेको व्यापारीको गुनासो छ।

पछिल्ला चार वर्षमा रु २० हजारभन्दा बढीले च्यांग्राको भाउ बढेको छ। छ वर्षदेखि च्यांग्राको कारोबार गर्दै आएका केसीले महँगो परे पनि दसैँका बेला च्यांग्राको मासु उपभोक्ताको रोजाइमा पर्ने गरेको अनुभव सुनाए। उनको सदरमुकाममा मासु पसलसमेत छ। गत वर्ष च्यांग्राको मासु प्रतिकिलो रु १४ सय पुगेको थियो।

यस वर्ष मूल्य झन् बढ्ने भएको छ। च्यांग्राको व्यापारबाट पहिलेपहिले जस्तो कमाइ हुन छाडेको व्यापारी बताउँछन्। व्यापारीले एउटा च्यांग्रामा रु एक/दुई हजारसम्म फाइदा राखेर बेच्ने गरेका छन्। हिमाली हावापानीमा जडीबुटी खाएर हुर्केको हुनाले च्यांग्रा स्वादिष्ट र स्वस्थकर मानिन्छ।

असोज १८, २०७८ मा प्रकाशित
प्रतिक्रिया दिनुहोस्