जनकपुरधाम – दसैँको आठौँ दिन जनकपुरधामको शक्तिपिठहरुमा खोँइछ भर्नेको भिड लागेको छ । राजा जनकको कुलदेवीको रुपमा चिनिने राजदेवी मन्दिरसहित जनकपुरधामको विभिन्न स्थानमा विवाहिता महिलाले सप्तमी तिथिदेखि नै खोँइछ भरिरहेका छन् ।

खोँइछ भर्नका लागि हजारौँको संख्यामा महिलाहरु राजदेवी मन्दिरसहित रामानन्द चौक, मुरली चौक, पिडरीयामाइस्थान लगायतका स्थानमा खोँइछ भरिरहेका छन् ।

त्यस्तै पर्सादी चढाउनको लागि मंगलबार राति ११ बजेदेखि नै ठूलो लाइन लागेको छ । हजारौँको संख्यामा श्रद्धालु भक्तजनहरु पर्सादी चढाउन लाइन लागेका छन् ।

बुधबार जनकपुरधामका शक्तिपिठहरुमा बिहानैदेखि खोँइछ भर्न महिलाहरुको भिड लागेको छ भने पर्सादी चढाउन लामो लाइन लागेको छ । राजदेवी मन्दिरमा प्रत्येक वर्ष खोँइछ भर्न महिलाहरुको भिड लाग्ने गरेको छ ।

मिथिलामा छोरीको बिदाई भन्दा पहिले खोँइछ दिने परम्परा छ । बुधबार रातिदेखि बलिप्रदान दिने भएको छ ।

त्यसको लागि नेपालसहित भारतको सीमावर्ती क्षेत्रबाट श्रद्धालुभक्तजनहरु बोकाबलीको लागि यहाँ आउने गरेका छन् । प्रत्येक वर्ष यहाँ राजदेवी मन्दिरमा मात्र हजारौँको संख्यामा बलिप्रदान हुनेगरेको छ ।