कुमारीघरको तीन सय वर्ष पुरानो तोरण बेलायतको निजी ग्यालरीमा फेला

काठमाडौँ – जीवित देवीका रुपमा पुजिने बसन्तपुरस्थित कुमारीघर (कुमारी छेँ) बाट चोरी भएको देवी दुर्गाको आकृतिसहितको काठको तोरण बेलायतको लण्डनस्थित एक निजी ग्यालरीमा भेटिएको छ।

बसन्तपुर दरबार क्षेत्रको कुमारीघरबाट सन् १९८०–९० को दशकमा चोरी भएको देवी दुर्गाको आकृतिसहितको झण्डै तीन सय वर्ष पुरानो (१८ औँ शताब्दी) तोरण बरकत ग्यालरीको बेलायतस्थित शाखामा भेटिएको हो।

नेपालबाट हराएका वा चोरी भएका पुरातात्विक महत्वका सम्पदाको पहिचानमा सक्रिय रहँदै आएको ‘लस्ट आर्टस् अफ नेपाल’ ले शुक्रबार जारी गरेको सूचनामा विश्वका विभिन्न देशमा शाखा रहेको निजी ग्यालरी बरकतको लण्डनस्थित शोरुममा काठको तोरण पहिचान भएको उल्लेख छ।

सन् १९८० देखि २०११ को बीचमा कुमारीघरको भुइँ तलाको उत्तरतर्फका चार तोरण चोरी भएको थियो। ७० को दशकदेखि नै नेपाली साँस्कृतिक–पुरातात्विक महत्वका सम्पदाहरु चोरी हुँदै आएका थिए।

कुमारीघरमा २०७२ को भूकम्पपछि नयाँ तोरण बनाएर राखिएको छ। तर चोरी भएका तोरण कहाँ छन् भन्नेबारे अहिलेसम्म जानकारी थिएन।
‘लस्ट आर्टस् अफ नेपाल’ ले पछिल्लो समय नेपालबाट चोरी भएका सम्पदाहरुको पहिचानलाई अभियानका रुपमा सञ्चालन गर्दै आएको छ।

नेपालबाट चोरिएका वा हराएका सम्पदाहरु पश्चिमा देशका विभिन्न संग्रहालय तथा निजी ग्यालरीहरुमा पहिचान हुँदै आएका छन्।

मंसिर १०, २०७८ मा प्रकाशित
प्रतिक्रिया दिनुहोस्