तत्काल संविधान संशोधन गरेर अघि बढ्न जसपा प्रतिवद्ध छः डा. भट्टराई

फाइल तस्बिर

काठमाडौँ– सत्ता साझेदार दल जनता समाजवादी पार्टी संघीय परिषदका अध्यक्ष डा. बाबुराम भट्टराईले तत्काल संविधान संशोधन गरेर अघि बढ्न आफ्नो पार्टी प्रतिवद्ध रहेको बताएका छन्।

पूर्वप्रधानमन्त्रीसमेत रहेका भट्टराईले सबै उत्पीडित समुदायको अधिकार सुनिश्चित गर्नका लागि आफ्नो पार्टी संविधान संशोधन गर्ने एजेन्डामा लागिपरेको दावीसमेत गरे।

शनिबार काठमाडौँमा आयोजित एक कार्यक्रममा बोल्दै उनले सबै उत्पीडित समुदायको अधिकार सुनिश्चित हुनेगरी संविधान संशोधन गर्न एकतावद्ध भएर अघि बढन पनि आह्वान गरे। अध्यक्ष भट्टराईले संविधान संशोधन गर्नुपर्छ भन्ने कुरालाई आफ्नो पार्टीले संसदमा कुरा उठाइराखेको र मन्त्रिपरिषदमा पनि सरकारमा सहभागी मन्त्रीमार्फत् सो प्रस्ताव पेश गर्न लगाउने आश्वासनसमेत दिए।

उनले भने, ‘फेरि पनि संघर्ष नगरीकन यो प्राप्त हुँदैन। अहिले संसदबाट मात्रै सबैथोक होस् भनेर मात्रै हुँदैन, सांकेतिक हुन्छ। किनभने हामी संसदबाट पनि बोलिराखेका छौँ। सडकबाट पनि बोलकै छौँ। र सरकारमा पनि भएको बेलामा संविधान संशोधन हुनुपर्छ भन्ने विषयमा हामी कुरा राख्छौँ। शक्ति नभइकन सत्ता, न्याय र अधिकार प्राप्त हुँदैन, त्यसो गर्नका निम्ति अब हामीले एक ढिक्का भएर अगाडि बढौँ। त्यसका निम्ति जनता समाजवादी पार्टी प्रतिवद्ध छ।’

अध्यक्ष भट्टराईले फेरि पनि संघर्ष नगरीकन न्याय र अधिकार प्राप्त गर्न नसकिने तर्कसमेत गरे। उनले नेवाः स्वायत्त राज्य स्थापनाका लागि नेवार समुदायले हस्तक्षेपकारी भूमिका निर्वाह गर्नुपर्ने बताए।

मंसिर १८, २०७८ मा प्रकाशित
प्रतिक्रिया दिनुहोस्