‘सहकारी आफ्ना सदस्यप्रति उत्तरदायी बन्नुपर्छ’

काठमाडौँ – भूमि व्यवस्था, सहकारी तथा गरिबी निवारणमन्त्री शशी श्रेष्ठले सहकारीहरू आफ्ना सदस्यप्रति उत्तरदायी बन्नुपर्ने बताएकी छन्।

काठमाडौंमा शुक्रबार आयोजित राष्ट्रिय सहकारी बैंक लिमिटेडको १८औं वार्षिक साधारण सभा, एकाइ प्रतिनिधिको सभामा मन्त्री श्रेष्ठले समुदायतर्फ सदैव जिम्मेवार बनेर आममानिसको भरोसा बढाउनु सहकारीको दायित्व भएको बताइन्।

उनले सहकार्यको भावनामा सञ्चालन हुने निकाय सहकारीमा सबैभन्दा बढी ब्याज रहेको भन्ने व्यापक जनगुनासो आइरहेकाले यसलाई तत्काल निकास दिन आवश्यक रहेकोमा जोड दिइन्।

‘सहकारीको सिद्धान्त, उद्देश्य र मर्मअनुसार नचल्दा वित्तीय सुशासन कायम हुन नसकी सहकारीप्रति बचतकर्ताको विश्वासमा कमी आएको देखिएको छ,’ उनले भनिन्, ‘सहकारी क्षेत्रमा देखिएका चुनौती र जोखिम न्यूनीकरण गर्दै यस क्षेत्रप्रति आमनागरिकको विश्वास र भरोसा बढाउँदै लगानी गर्न आकर्षित गर्नु सबैको दायित्व हो।’

मन्त्री श्रेष्ठले संविधानले सहकारीलाई आर्थिक विकासको मेरुदण्डका रुपमा लिएको र आर्थिक विकास तथा समृद्धिका लागि सहकारीको भूमिका महत्वपूर्ण हुने भन्दै सहकारीलाई सदस्य केन्द्रित भई व्यावसायिक बनाउनुपर्नेमा बताइन्।

सहकारीबाट तल्लो तहका जनता लाभान्वित हुने र सहकारी त्यहीअनुसार चल्ने भएकाले सोही अनुसार भिजन पेपर तयार पारिरहेको पनि मन्त्री श्रेष्ठले जानकारी दिइन्।

सहकारीको सिद्धान्त मूल्य–मान्यता र प्रचलित ऐन कानुनको पूर्ण परिपालना गर्दै संविधानमा समृद्धिको आधारस्तम्भ मानिएको सहकारी अभियानलाई थप प्रभावकारीतासाथ अघि बढाउन राष्ट्रिय सहकारी बैंकले अझै महत्वपूर्ण भूमिका निर्वाह गर्नुपर्नेमा पनि मन्त्री श्रेष्ठले जोड दिइन्।

पुस ३०, २०७८ मा प्रकाशित
प्रतिक्रिया दिनुहोस्