जडान नहुँदै भत्कियो बेलिब्रिज

मुगु – हुम्ला लिङ्क रोडको मुगु खण्डमा पर्ने मुगु कर्णाली नदीमा निर्माण कार्य अन्तिम चरणमा पुगेको बेलिब्रिज भत्किएको छ। छायाँनाथ रारा नगरपालिका वडा नं १, ३ र १३ वडा भएर बग्ने मुगु कर्णाली नदीको भट्टेचौर भन्ने स्थानमा निर्माणको अन्तिम चरणमा पुगेको बेलिब्रिज जडान गर्ने क्रममा शुक्रबार राति भत्केको हो।

छायाँनाथ रारा नगरपालिकाका प्रमुख हरिजंग शाहीले गएको वर्षको चैत महिनाको ५ गते सो पुलको शिलान्यास गरेका थिए। पुस मसान्तसम्म निर्माण कार्य सम्पन्न हुने बेलिब्रिज भत्किँदा निर्माण कार्य अझै पछि धकेलिएको छ।

बेलिब्रिज भत्किँदा जडानमा अझै समय लाग्ने कम्पनीका प्रतिनिधि बखतबहादुर मल्लले बताए। बेलिब्रिज निर्माणका लागि जलब रवि चक्र जेवि निर्माण कम्पनीले नगरपालिकासँँग सम्झौता गरी निर्माण कार्य तोकिएकै मितिमा सम्पन्न गर्ने प्रतिबद्धता जनाएको थियो।

भत्केको बेलिब्रिज जडान गर्न एक सातादेखि १२ दिन लाग्ने मल्लको भनाइ छ। भत्केको बेलिब्रिजमा मानवीय क्षति भने भएको छैन। भत्केको बेलिब्रिजलाई ठड्याउन २ वटा मेसिन लगाइएको छ। पुलको बीचको भाग बाङ्गिएर काम नलाग्ने भएको छ। सो स्थानमा अरु नयाँ भौतिक संरचना जडान गर्नुपर्ने अवस्था सिर्जना भएको छ।

नगरपालिकालाई हस्तान्तरण गर्ने अवस्थामा रहेको पुल एक्कासी भत्किदा हस्तान्तरण गर्न ढिलाइ हुने उनले बताए। ५ करोड २० लाख ५५ हजार ९०२ रुपैयाँको लागतमा बन्ने यो बेलिब्रिजको लम्बाइ ५५ मिटर छ।

ग्रामीण पहुँच कार्यक्रम (र्‍याप ३) ले मुगु जिल्लाको सदरमुकाम गमगढीदेखि हुम्ला जिल्लाको चंखेली गाउँपालिका देउलीसम्म जनताको सहभागितामार्फत सडक बनाए पनि मुगु कर्णालीमा पुल नहुँदा यो सडक संचालनमा समस्या हुँदै आएको थियो।

मुगु कर्णालीमाथि बेलिब्रिज निर्माण भएमा केही बस्तीका साथै हुम्ला जिल्लाका चंखेली, सर्केगाढ ,अदानचुली , खार्पुनाथ , सिमीकोट गाउँपालिकाका स्थानीयसम्म समयमै सडक पुग्ने अवस्था थियो, तर जडान कार्यमै पुल भत्किदा अलि लामो समय लाग्ने बताइएको छ। -न्युज कारखाना

माघ ८, २०७८ मा प्रकाशित
प्रतिक्रिया दिनुहोस्