विश्लेषकको आँकलन विपरित कसरी बढ्यो एप्पलका उत्पादनको बिक्री?

विश्वव्यापी रुपमा माइक्रोचिप्सको कमका बाबजुद गएको क्रिसमसका बेला एप्पलको आइफोनसहितका उत्पादनको बिक्री बढेको देखिएको छ ।

एप्पलका उत्पादनको बिक्रीमा कमी आउने अनुमान गरिएको थियो । तर ती अनुमानहरुलाई गलत साबिद गर्दै गएको अक्टोबरदेखि डिसेम्बरसम्ममा एप्पलको बिक्री ११ प्रतिशतले बढेको हो । एप्पलले सो अवधिमा १२३.९ अर्ब डलर बराबरको बिक्री गरेको हो ।

सार्वजनिक भएको प्रतिवेदनमा एप्पलका उत्पादनको बिक्री बढ्ने क्रम जारी रहने उल्लेख छ । योसँगै कम्पनीको शेयर मूल्य चार प्रतिशतले बढेको छ । कोरोना भाइरसको महामारीका कारण मानिसहरु धेरै समय अनलाइनमा रहेकाले एप्पलको बिक्री बढेको हो ।

गएको वर्ष विश्लेषकहरुले विश्वव्यापी रुपमा देखिएको माइक्रोचिप्सको अभावले एप्पलको बिक्री प्रभावित हुने चेतावनी दिएका थिए । तर गएको बिहीबार एप्पलले आफ्नो त्रैमासिक तथ्यांक जारी गरेर बिक्री बढेको जनाएको हो ।

एप्पलका उत्पादन मध्ये म्याक बुकको बिक्री १३ प्रतिशत र आइफोनको बिक्री ९ प्रतिशतले बढेको हो। तर आइप्याडको बिक्रीमा भने १४ प्रतिशत गिरावट आएको छ । यसले कम्पनीको समग्र बिक्रीलाई भने खासै प्रभाव पारेको छैन ।

माघ १४, २०७८ मा प्रकाशित
प्रतिक्रिया दिनुहोस्