युक्रेन युद्ध

युक्रेनको हवाई क्षेत्र कब्जा गर्न रुस असफल – बेलायत

रुसी आक्रमणको केन्द्रमा आएको मारिपोल शहरमा लगातार मिसाइल तथा रकेट प्रहार हुँदा आवासीय क्षेत्र ध्वस्त भएका छन् । तस्बिर : गेट्टी इमेज

रुसले युक्रेनको हवाई क्षेत्रमा नियन्त्रण कायम गर्न असफल भएको बेलायती रक्षा मन्त्रालयले जनाएको छ। रुसले युक्रेनमाथिको आक्रमण आफ्नो पक्षमा ल्याउनका लागि युक्रेनी हवाई क्षेत्र नियन्त्रणको प्रयास गरिरहेको छ। तर त्यसमा रुस असफल भइरहेको बेलायती रक्षा मन्त्रालयले जनाएको हो।

पछिल्लो अद्यावधिक गुप्तचर सूचनामा युक्रेनको हवाई क्षेत्रमा नियन्त्रण कायम गर्न नसकेको रुसले अधिकांश हवाई आक्रमण आफ्नै भूमिबाट गरिरहेको उल्लेख छ। ‘आक्रमणको पहिलो दिनदेखि नै मस्को युक्रेनी हवाई क्षेत्रमा नियन्त्रण चाहन्थ्यो, तर त्यसमा लगातारको असफलताले रुसी सैनिक अघि बढ्न सकिरहेका छैनन्’, बेलायती रक्षा मन्त्रालयको गुप्तचर सूचनामा भनिएको छ।

रुसले लगातार युक्रेनका आवासीय क्षेत्र, सैन्य ब्यारेक, अस्पताल, चर्च, सार्वजनिक स्थलसहितलाई निशाना बनाएर मिसाइल, रेकट तथा गोलाबारी गरिरहेको छ।

युक्रेनले रुसी हवाई आक्रमणबाट हुने मानवीय क्षति रोक्नका लागि आफ्नो आकाशलाई नो फ्लाइ जोन अर्थात उडान प्रतिबन्धित क्षेत्र घोषित गर्न माग गर्दै आएको छ। तर नेटो सैन्य गठबन्धनमा रहेका पश्चिमा राष्ट्रले त्यसो गर्दा तेस्रो विश्वयुद्ध सुरु हुन सक्ने भन्दै उडान प्रतिबन्धित क्षेत्र घोषणा गर्न अस्वीकार गरेका छन्।

रुसले गएको फेब्रुअरी २४ देखि युक्रेनमा आक्रमण गर्दै आएको छ।

चैत ६, २०७८ मा प्रकाशित
प्रतिक्रिया दिनुहोस्