तीन दिनदेखि अवरुद्ध हुम्लाको सञ्चार सेवा सुचारु

फाइल तस्बिर।

सिमकोट– तीन दिनदेखि अवरुद्ध रहँदै आएको हुम्लाको सञ्चार सेवा सुचारु भएको छ। कालिकोट जिल्लाको महावु लेकमा रहेको नेपाल टेलिकमको टावरको मर्मतपछि हुम्लाको अवरुद्ध सञ्चार सेवा सुचारु भएको हो।

नेपाल टेलिकम हुम्लाकी प्रमुख रिजिआङ्वु लामाकाअनुसार टेलिकमका अवरुद्ध सबै सेवा तीन दिनपछि सुचारु भएका छन्। कालिकोटको महावु लेकको टावरमा समस्या आउँदा हुम्लामा गत आइतबारदेखि इन्टरनेट सेवा प्रभावित भएको थियो।

उनले टावरको रेडियो लिङ्कमा नयाँ उपकरण जडानपछि टेलिकमको एडीएसएल, मोबाइल र फोरजी सेवा सुचारु भएको जानकारी दिइन्।

रेडियो लिंकमा भएको समस्या समाधानको लागि प्राविधिक टोली महाबु लेकमा सोमबार बेलुका पुगेको भएपनि मंगलबार दिउँसो मात्र मर्मत गरेर सेवा सुचारु गर्न सफल भएको हो। सञ्चार सेवा अवरुद्ध हुँदा स्थानीय तह निर्वाचनको बारेमा जानकारी लिन मुख्य निर्वाचन अधिकृतको कार्यालयलाई कठिन भएको थियो।

त्यसैगरि महावुलेक नजिकको लेकमा फाइवरमा समस्या आएपछि जिल्लामा इन्टरनेट सेवा उपलब्ध गराउँदै आएको इन्टरनेट सेवा प्रदायक कम्पनी वर्ल्ड लिंकको सेवा पनि तीन दिनपछि सुचारु भएको छ।

आइतबार बिहानैबाट आएको इन्टरनेटको समस्याले जिल्लास्थित सबै सरकारी तथा निजी कार्यालय र बैंकहरूको काम ठप्प भएको थियो।

बैशाख २०, २०७९ मा प्रकाशित
प्रतिक्रिया दिनुहोस्