आज भलिबल दिवस, विभिन्न कार्यक्रम गरी मनाइँदै

काठमाडौँ – राष्ट्रिय खेल भलिबल घोषणा भएको आज पाँच वर्ष पुगेको छ।

तत्कालीन प्रधानमन्त्री पुष्पकमल दाहालको नेतृत्वको सरकारले २०७४ साल ८ जेठ गते नेपालको राष्ट्रिय खेल भलिबल घोषणा गरेको थियो।

त्यसयता नेपाल भलिबल संघ, भलिबल क्लब र एकेडेमीका रूपमा रहेका संघ संस्थाले विभिन्न कार्यक्रम आयोजना गरी यो दिनलाई मनाउँदै आएका छन्।

आज जावलाखेल भलिबल प्रशिक्षण केन्द्रले खेलकुद पत्रकारसहित भलिबलमा क्रियाशील ब्यक्तिबीच मैत्रीपूर्ण खेल आयोजना गर्दै भलिबल दिवस मनाउने भएको छ।

यता, न्यु डायमन्ड एकेडेमीले पुरानो नैकापमा साँझ त्रिभुवन आर्मी क्लबसँग खेल्दै दिवस मनाउने योजना बनाएको छ।

नेपाल भलिबल संघका सदस्य तथा पूर्व खेलाडी भरत शाह भलिबललाई व्यवस्थित, विस्तार र भलिबल खेलको पूर्वाधारमा सहयोग गर्न सरोकारवाला निकायले सहयोग गर्नुपर्ने बताउँछन्।

‘हामी विस्तारै व्यवसायिक हुँदै छौँ। यसलाई अझै विस्तार गर्न सरोकारवाला निकायले सहयोग गर्नुपर्छ। संघ एक्लैले केही गर्न सक्दैन’ उनले भने।

जेठ ८, २०७९ मा प्रकाशित
प्रतिक्रिया दिनुहोस्