मनोज पाण्डेले यौन शोषण गरेको भन्दै अन्य महिला पनि प्रहरी सम्पर्कमा

सांकेतिक तस्बिर

काठमाडौँ- कन्सल्टेन्सी सञ्चालक मनोज पाण्डेले यौन शोषण गरेको भन्दै अन्य युवतीहरु पनि प्रहरी सम्पर्कमा पुगेका छन्।

स्रोतका अनुसार सामाजिक सञ्जालका माध्यमबाट अन्य दुई/तीन जना युवतीहरु पनि पाण्डेले यौन शोषण गरेको भन्दै प्रहरी सम्पर्कमा आएको बताएका छन्।

सम्पर्कमा आएका ती युवतीहरुसँग थप अनुसन्धान भइरहेको प्रहरी स्रोतले जनाएको छ। स्रोतका अनुसार सामाजिक सञ्जालबाट प्रहरीलाई सम्पर्क गरेकी एक युवतीले भने आइतबार उपत्यका प्रहरी अपराध महाशाखामा नै पुगेर आफू पनि पाण्डेबाट यौन शोषणमा परेको बताएकी हुन्।

सोमबार पाण्डेलाई प्रहरीले जिल्ला अदालत काठमाडौँमा उपस्थित गराउने भएको छ।

अनुसन्धानका लागि सोमबार म्याद लिने तयारी भइरहेको महाशाखा प्रमुख एसएसपी वसन्त कुँवरले बताएका छन्।

एक ब्यूटी प्याजेन्टको क्रममा आयोजकले नै आफूमाथि बलात्कार गरेको दाबी गर्दै एक युवतीले सामाजिक सञ्जालमा भिडियो सार्बजानिक गरेकी थिइन्।

भिडियोमा भनिएका कन्सल्टेन्सी सञ्चालक मनोज पाण्डेलाई प्रहरीको नियन्त्रणमा रहेका छन्।

आठ बर्षअघि आफूमाथि बलात्कार भएको दाबी गर्दै एक युवतीले भिडियो मार्फत सार्बजनिक गरेसँगै त्यस्ता खालका अन्य घट्नाहरु समेत बाहिर आउन थालेका छन्।

इटहरीमा एक विद्यालयको प्रिन्सिपलबाट लगातार दुई बर्षसम्म बलात्कार भएको दाबी गर्दै एक युवतीले सामाजिक सञ्जाल फेसबुकमा सार्वजनिक गरेकी छन्।

जेठ ८, २०७९ मा प्रकाशित
प्रतिक्रिया दिनुहोस्