लिमीको स्राेतकेन्द्रमा ११४ चौरी थपिए

सिमकोट- हुम्लाकाे नाम्खा गाउँपालिका-६ को लिमीको चौरी स्राेतकेन्द्रमा ११४ वटा चौरी थपिएका छन्।

चौरीपालनको राम्रो सम्भावना भएको लिमीमा तीन वर्षअघि चौरी पालन स्राेतकेन्द्र स्थापना गरेर चौरी थप्ने कार्य जारी रहेको हो।

पशु अस्पताल तथा पशुसेवा कार्यालयका प्रमुख ज्ञानेन्द्र बुढाथापाका अनुसार लिमीको चौरी स्राेतकेन्द्रमा १११ वटा नाक (चौरी गाई) र तीनवटा याक गरी १४ वटा चौरी यसवर्ष थपिएका हुन्।

त्यसमा ४५ वटा चौरी स्राेतकेन्द्रमै खरिद गरेर स्थानीयले ल्याइसकेको र बाँकी नाम्खाकै अन्य गाउँपालिका ६९ वटा खरिद गरेर स्राेतकेन्द्रमा लिने कार्य भई रहेको छ।

स्थलगत रूपमा पुगेका उनले स्राेतकेन्द्र चौरीमय भएको बताए। यसका लागि कार्यालयले ५९ लाख बजेटको व्यवस्था गरेको थियो भने उपभोक्ताबाट तीस प्रतिशतका दरले हुन आउने २५ लाख स्थानीय उपभोक्ताहरूले लागत साझेदारी गरेका छन्।

यीसहित स्राेत केन्द्रमा २४६ चौरीको सङ्ख्या पुगेको छ। यसअघि गत वर्षसम्म १३२ चौरी थिए।

स्राेत केन्द्रमा आगामी तीन वर्षमा पाँच सय चौरी पुर्‍याउने लक्ष्य कार्यालयको रहेको छ। स्राेतकेन्द्र स्थापना भएयता उत्पादन भएको छुर्पी, घ्यू, चीज लगायतका सामान बिक्री गरिँदै आएको छ।

केही समय अगाडिसम्म लिमीका स्थानीयले दुई हजारसम्म चौरी पाल्दै आएका थिए। पछि चरन समस्या देखाउँदै लिमीवासीले चाैरीपालन छाडेका थिए।

हाल लिमीका स्थानीयसँग डेढ सय चौरी रहेका छन्।

जेठ १७, २०७९ मा प्रकाशित
प्रतिक्रिया दिनुहोस्