सबै न्यायाधीशमाथि छानबिन गर्न वकिलहरुको माग

काठमाडौँ – वकिलहरुको एक समूहले न्यायपालिकामा मौलाएको भ्रष्टाचार नियन्त्रण गरी दोषीमाथि कारबाही गर्न शक्तिशाली छानबिन आयोगको माग गरेको छ।

जिल्ला अदालतका न्यायाधीश राजकुमार कोइराला र अधिवक्ता रुद्र पोखरेलबीच इच्छाराज तामाङलाई छुटाउन घुसको लेनदेन भएको अडियो सार्वजनिक भएपछि वकिलहरुले सर्वोच्चका पूर्वन्यायाधीशसहित सबै न्यायाधीशमाथि छानबिनको माग गरेका हुन्।

पछिल्लो अडियो प्रकरणले न्याय खरिद बिक्री हुने गरेको तथ्या उजागर गरेको दाबी वकिलहरुले गरेका छन्।

कायम मुकायम प्रधानन्यायाधीश दीपककुमार कार्कीलाई बुझाएको ज्ञापन पत्रमा उनीहरुले भनेका छन्, ‘अब तपाईँको नेतृत्वमा श्री सर्वोच्च अदालतका पूर्व प्रधान न्यायाधीश लगायत सबै न्यायाधीशको सम्पति छानबिन गरी दोषीमाथि कार्यबाही गर्न र बिचौलियाको रुपमा काम गर्ने कानून ब्यबसायी लगायतका व्यक्तिमाथि छानबिन गरी कार्यबाही गर्न एक शक्तिशाली, निष्पक्ष र विश्वसनीय आयोग बनाउने दिशामा कार्य होस् भनी हामीअनुरोध गर्दछौँ। श्री सर्बोच्च अदालतको फूल कोर्टले निर्णय गरेर वा यसै ज्ञापनपत्रलाई सार्बजनिक सरोकारको मुद्धाको रुपमा ग्रहण गरेर वा न्यायपरिषद ऐन अन्तर्गत समेत यस किसिमको आयोग गठन गर्न सकिने तर्फ सम्माननीयज्यूको ध्यान जाओश भन्ने पनि हामी अनुरोध गर्न चाहन्छौं।’

वरिष्ठ अधिवक्ताहरु धुव्रलाल श्रेष्ठ, सुरेन्द्र भण्डारीसहित १६ जना अधिवक्ताहरुले न्यायाधीश कोइरालामाथि न्यायपरिषदको छानबिन समितिलाई दिएको ४५ दिनको समय बढी भएकाले सात दिनमा झार्न माग गरेका छन्।

कोइरालाले तथ्य स्वीकार गरिसकेको अवस्थामा धेरै समय दिँदा विषय ओझेलमा पर्ने दाबी गर्दै वकिलहरुले सात दिनभित्र छानबिन गरेर कोइराला र अधिवक्ता पोखरेललाई समेत कारबाहीको दायरमा ल्याउन माग गरेका छन्।

‘स्वयं माननीय न्यायाधिश श्री राजकुमार कोइरालाले उक्त अडियोको आधिकारिकता पुष्टि गरे पश्चात छानबिनकालागि ४५ दिनको समयले विषयबस्तुको गम्भीरतालाई ओझेलमा पार्न सक्दछ । यति संबेदनशील बिषयमा छिटो छरितो र बस्तुगत रुपमा छानबिन होस् भन्ने नै सर्बसाधारण नेपाली नागरिक र हामि जस्ता कानून ब्यबशायिको धारणा रहेको छ । तसर्थ यो बिषयमा ७ दिन भित्र छानबिन गरी दोषी माथि कानून बमोजिम कार्यबाही हुनु पर्दछ भन्ने हाम्रो बिश्वाश रहेको छ, ज्ञापनपत्रमा भनिएको छ।

को को छन् ज्ञापनपत्रमा हस्ताक्षर गर्ने वकिलहरु?

असार ९, २०७९ मा प्रकाशित
प्रतिक्रिया दिनुहोस्