बाजुरामा पहिलो पटक स्त्रीरोग विशेषज्ञ डाक्टर आउँदै, स्थानीय हर्षित

धनगढी – स्त्री रोग विशेषज्ञ नहुँदा महिला तथा त्यसैमा पनि गर्भवती महिलालाई उपचारमा समस्या भइरहेको बाजुरामा अब स्त्रीरोग विशेषज्ञ डाक्टर जाने भएका छन्।

स्वास्थ्य सेवाका हिसाबले पछि रहेको बाजुरा जिल्लामा विशेषज्ञ डाक्टर नहुँदा उपचारमा निकै समस्या हुने गरेको छ। जिल्ला अस्पताल बाजुरामा उपचारका लागि आउने महिलाहरुलाई स्त्रीरोग विशेषज्ञ नहुँदा धेरै रोग लुकाउनु पर्ने अवस्था छ।

बुधबार मात्र जिल्लामा स्त्री रोग विशेषज्ञ नहुँदा दुई जना गर्भवती महिलालाई हेलिकोप्टरबाट उपचारका लागि बाहिर लगिएको थियो। जिल्ला अस्पताल बाजुरामा मेडिकल सुपरिटेण्डेण्टको जिम्मेवारी पाए लगत्तै स्त्री रोग विशेषज्ञका लागि पहल सुरु गरेका डाक्टर मिलन जोशीले अबको एक साता भित्र स्त्रीरोग विशेषज्ञ जिल्ला अस्पतालमा हाँजीर हुने बताए।

उनले भने,’काठमाडौँमा एक जना स्त्रीरोग विशेषज्ञ डाक्टरसँग बाजुरा अस्पतालमा आउने सहमति भइसकेको छ, एक साता भित्रै अस्पतालमा सेवा दिनुहुन्छ।’

अन्य सेवा तथा उपचार नियमित भैरहेको भएपनि स्त्रीरोग विशेषज्ञ नहुँदा गर्भवती महिलाको उपचारमा समस्या हुने गरेको डाक्टर मिलनको भनाई छ। दुर्गम जिल्ला भएकाले धेरै डाक्टरहरु बाजुरा आउन मान्दैनन् डाक्टर मिलनले भने कोही आइहाले पनि बस्न मान्दैनन्,अहिले एक जना स्त्रीरोग विशेषज्ञ डाक्टरलाई कन्भेन्स गरेर बाजुरा आएर सेवा दिने पक्का भएको छ।

बाजुरा जिल्लामा कुनैपनि ठाउँमा स्त्रीरोग विशेषज्ञ नहुँदा स्वास्थ्य शिवीरहरु सञ्चालन गर्न समेत समस्या भइरहेको उनको भनाई छ। उनले शिवीर सञ्चालन गर्दा अधिकांश महिलाहरु उपचारका लागि आउने गरेको बताउँदै त्यसका लागि स्त्रीरोग विशेषज्ञ अनिवार्य देखिएको बताए। यी सबै समस्याका कारण स्त्रीरोग विशेषज्ञ बाजुरामा ल्याउन आफूले पहल गरेको डाक्टर मिलनले बताए।

अहिले बाजुरा जिल्ला अस्पतालको सेवामा निकै सुधार भएको पत्रकार महासंघ बाजुराका अध्यक्ष छक्क मल्ल बताउँछन्। उनले पछिल्ला केही महिना यता जिल्ला अस्पतालको सेवामा सुधार भएको बताउँदै स्त्रीरोग विशेषज्ञ आएपछि महिलालाई उपचारमा ठूलो सहयोग पुग्ने बताए।

मेडिकल सुपरिटेण्डेण्ट डाक्टर जोशीले स्वास्थ्य सेवामा निकै पछाडी रहेको बाजुराको स्वास्थ्य सेवा सुधार गर्नु नै आफ्नो लक्ष्य रहेको बताए। उनले भने,’म पनि दुर्गममै जन्मेको हुनाले दुर्गमको स्वास्थ्य उपचार र स्थानीयका पीडा थाहा छन्, जागिर खानु मात्रभन्दा पनि केही सुधार गर्न सके मात्र म सफल हुन्छु यसका लागि सबैसँग सहकार्य गरेर अघि बढ्छु।’ डाक्टर मिलन पनि छिमेकी जिल्ला बझाङका हुन्।

पहिलाे पटक गाउँमै  स्त्रीरोग विशेषज्ञ डाक्टर आउँदा स्थानीय हर्षित भएका छन्। सुत्केरी बेथाले च्याप्दा पनि गाउँमा उपचार हुन नसक्दा हेलिकोप्टरमार्फत बाहिर लैजानुपर्दा कतिपय अप्रिय घटना सुन्नु परेका गाउँलेहरू अब भने गाउँमै स्तरीय स्वास्थ्य सेवा पाउँने कुराले हर्षित भएका हुन्।

साउन १९, २०७९ मा प्रकाशित
प्रतिक्रिया दिनुहोस्