निर्वाचनका लागि लिमीमा खटिएका एक जना महिला कर्मचारी लेक लागेर बिरामी

सिमकोट – नाम्खा गाउँपालिका– ६ को हिमालपारिको गाउँको मतदान कार्यका लागि खटिएका एक जना महिला कर्मचारी लेक लागेर बिरामी भएकी छन्। मंगलबार रातिबाट उनलाई लेक लागेर टाउको दुख्ने र श्वासप्रश्वासमा समस्या देखिएपछि बिरामी भएकी हुन्।

लिमीको तिल मतदान केन्द्रका खटिएकी सहायक मतदान अधिकृत नवीन आचार्यका अनुुसार हल्जी मतदान केन्द्रमा खटिएकी सुन्दरी शाहीलाई लेक लागेर बिरामी भएकी छन्।

उनले हिजो रातिबाट टाउको दुुख्ने र श्वासप्रश्वासमा समस्या आएपछि शाही बिरामी भएको बताए। उनको अवस्था अहिले पनि उस्तै रहेका कारण चाँडो उद्धार गर्न उनले आग्रह गरे।

लिमीका तीन वटा मतदान केन्द्रका मतपेटिका र १३ जना मतदानमा खटिएका कर्मचारी र सुरक्षाकर्मी सोमबारबाट हेलिकोप्टरमा ओसारिए पनि बाँकी ५१ जना कर्मचारी र सुरक्षाकर्मी लिमीको हल्जीमा छन्।

प्रमुख जिल्ला अधिकारी सीता परियारले लिमी खटिएका कर्मचारी र सुरक्षाकर्मी सबै हेलिकोप्टरमा ओसार्ने कार्यक्रम भए पनि हेली नआएका कारण ओसार्न नसकिएको बताइन्।

उनले सम्भवतः बुधबार हेलिकोप्टर आउने र लिमीका सबै कर्मचारी र बिरामीको समेत उद्धार हुने बताइन्। लिमी जाने दुुई वटै नाका हिउँ जमेका कारण पैदल मार्ग बन्द छ। यसअघि लिमी अटिएका कर्मचारीलाई पनि हेलिकोप्टरबाटै लिमी लगिएको थियो।

मंसिर ७, २०७९ मा प्रकाशित
प्रतिक्रिया दिनुहोस्