फाइल तस्बिर।

धनगढी – नेपाली कांग्रेस सुदूरपश्चिम प्रदेशसभामा सबैभन्दा ठूलो दल बनेको छ । निर्वाचनकाे परिणाम अनुसार प्रदेशसभा सदस्य प्रत्यक्षतर्फको ३२ सिटमध्ये हालसम्म घोषित ३० सिटमा कांग्रेसले ११ सिट जितेर सबैभन्दा ठूलो दल बनेको हाे ।

प्रदेशका नाै जिल्ला मध्य ८ जिल्लाकाे मतगणना सम्पन्न भएपनि बाजुरामा गत ४ गतेको निर्वाचनमा एक मतदान केन्द्रको चुनाव स्थगित भएका कारण प्रदेशसभा सदस्यका दुवै क्षेत्रको मतगणना सुरु भएको छैन् ।

अहिलेसम्म प्रत्यक्षतर्फ माओवादी केन्द्रले ८, नागरिक उन्मुक्ति पार्टीले ५, नेकपा एमालेले तीन र नेकपा एकीकृत समाजवादीले दुई सिट जितेको छ । एक सिट स्वतन्त्र उम्मेदवारले जितेका छन् ।

कांग्रेसले कैलाली र कञ्चनपुरमा ३/३, अछाममा २, तथा बझाङ, दार्चुला र बैतडीमा एक/एक प्रदेशसभा सदस्य सिट जितेको छ ।

माओवादी केन्द्रले अछाममा दुई सिट तथा डडेल्धुरा, दार्चुला, कञ्चनपुर, कैलाली, डोटी र बझाङमा एक/एक सिट जितेको छ । नागरिक उन्मुक्ति पार्टीले कैलालीमा पाँच सिट जितेको छ ।

एमालेले बैतडी, कञ्चनपुर र डोटीमा एक/एक सिट जितेको छ । एकीकृत समाजवादीले कैलाली र कञ्चनपुरमा एक/एक सिट जितेको छ ।

डडेल्धुरा (ख) बाट स्वतन्त्र उम्मेदवार ताराप्रसाद जोशीले जितेका छन्।

मंसिर ९, २०७९ मा प्रकाशित
प्रतिक्रिया दिनुहोस्