सीमामा हुने तस्करी नियन्त्रण गर्न डिआईजी मगरको निर्देशन

वीरगञ्ज – सशस्त्र प्रहरी नम्बर २ छिन्नमस्ता बाहिनी बर्दिबास महोतरीका सशस्त्र प्रहरी नायब महानिरीक्षक (डिआईजी) गणेश ठाडा मगरले सीमा क्षेत्रमा हुने तस्करी र राजस्व चुहावट नियन्त्रणमा नतिजामुखी काम गर्न मातहतका युनिटलाई निर्देशन दिएका छन्।

शुक्रबार सशस्त्र प्रहरी बल १३ नम्बर गण हेडक्वाटर पर्सामा निर्माण गरिएको सशस्त्र प्रहरी महिला ब्यारेक भवनको उद्घाटन समारोहमा सशस्त्र प्रहरी नायब महानिरीक्षक ठाडा मगरले भौतिक संरचना अभावमा पनि सशस्त्र प्रहरीले हरेक क्षेत्रमा सुरक्षा अवस्थालाई मजबुद बनाएको दावी गर्दै अहिले स्थानीय तहको सरकारले पनि भौतिक पूर्वाधार संरचना निर्माणमा सहयोग गरेकोले अब सशस्त्र प्रहरीले नतिजामुखी परिणाम आउनेगरी काम गर्नुपर्ने बताए।

पहिले भौतिक पूर्वाधार संरचना अभावमा कार्यसम्पादनमा समस्या र चुनौती हुने गरे पनि अहिले विस्तारै पूर्वाधार सम्पन्न गर्दै लगिएकोले परिणाममुखी काम गर्न निर्देशन दिए।

उत्तरी सिमानामा ७ वटा र दक्षिणी सिमानामा २०० गरी २ सय ७ वटा सीमा सुरक्षा पोष्ट स्थापना गरिएको र स्थापित सबै स्थान विस्तारै भौतिक पूर्वाधार सम्पन्न बनाउनेतर्फ सशस्त्र प्रहरी अगाडि बढिरहेको समेत बताए।

राज्य र जनताले अहिले सशस्त्र प्रहरीमाथि नजर लगाउन मात्रै नभई केही उपलब्धिको पनि आशा गरिरहेकोले जनता र आशा र भरोसा जित्ने गरी काम गर्न सशस्त्र प्रहरीहरुलाई निर्देशन दिए।

सबै सुरक्षा निकायको आपसी समन्वय र सामूहिक कार्यले नै निर्वाचनहरु शान्तिपूर्ण रुपमा सम्पन्न गर्न सफल भएको भन्दै उनले सबैलाई धन्यवाद पनि दिए। सशस्त्र प्रहरी बल १३ नम्बर गण हेडक्वाटर परिसरमा वीरगन्ज महानगरपालिकाको २४ लाख बजेटमा निर्माण गरिएको महिला ब्यारेक भवनको सशस्त्र प्रहरी नायव महानिरीक्षक गणेश ठाडा मगर र वीरगन्ज महानगरपालिकाका उपप्रमुख इम्तियाज आलमले संयुक्त रुपमा उद्घाटन गरेका थिए।

मंसिर १६, २०७९ मा प्रकाशित
प्रतिक्रिया दिनुहोस्