स्थानीय प्रशासनले बन्द गरायाे भैरहवामा रहेको ‘जेल रेष्टुरेन्ट’

बुटवल – रुपन्देहीको भैरहवामा रहेको जेल रेष्टुरेन्ट स्थानीय प्रशासनले बन्द गराएको छ।

भैरहवाको देवकोटा चोकमा रहेको जेल रेष्टुरेन्टले हत्कडी, बन्दुक जस्तो देखिने एयरगन र आत्महत्या गर्न प्रोत्साहन गर्ने फाँसी लगाउन प्रयोग गरिने सामग्रीहरू फेला परेपछि जिल्ला प्रशासन कार्यालय रुपन्देहीले बन्द गराएको हो।

रुपन्देहीका सहायक प्रमुख जिल्ला अधिकारी रामचन्द्र अर्यालका अनुसार जेल रेष्टुरेण्टमा आउने ग्राहकलाई लक्षित गरी रेष्टुरेण्टको कोठा जेलको आकारमा बनाएको, हत्कडी लगाउने र आत्महत्या गर्न प्रोत्साहन गर्ने खालको क्रियाकलाप गरेको पाइएकाले रेष्टुरेण्ट बन्द गराइएको हो।

रेष्टुरेण्टको अनुगमन गर्दा नियमकानुनभन्दा बाहिर गएको पाइएपछि रेष्टुरेन्ट बन्द गराएको र जिल्ला प्रशासन कार्यालयमा सम्पर्क राख्न आदेश दिएको बताए।

उनले अनुसन्धान गरी प्रचलित कानुनअनुसार कारबाही गर्ने जानकारी दिए।

माघ १०, २०७९ मा प्रकाशित
प्रतिक्रिया दिनुहोस्