चेलिबेटी बेचबिखनविरुद्धको सन्देशसहित हरिवंशले ल्याए ‘काउली’ (भिडियो)

काठमाडौँ – हास्य अभिनेता हरिवंश आचार्यको शब्द, संगीत र स्वर रहेको नयाँ गीत सार्वजनिक भएको छ। लोक लयमा आधारित ‘काउली’ बोलको उक्त गीतमा लोक गायिका शान्तिश्री परियारले उनलाई साथ दिएकी छन्।

गीतको भिडियोमा समेत आचार्य स्वयंले अभिनय गरेका छन्। भिडियोमा उनीसँगै पहिलोपल्ट प्रकाश सपुत र प्रियंका कार्कीले एकसाथ जोडी बाँधेका छन्। गीतको भिडियोमा चेलबेटी बेचबिखनविरुद्धको सन्देशसमेत दिन खोजिएको छ। गीतको भिडियो निर्देशन सरोज ओलीले गरेका हुन्।

हरिवंशका अनुसार उनले यो गीत निर्देशक ओलीकै एनिभर्सरीका दिन लेखेका हुन्। ‘एक वर्षअघि म सरोज भाइको एनिभर्सरीको पारिवारिक जमघटमा सहभागी हुन होटल तिब्बेतमा गएको थिएँ,’ हरिवंशले सम्झिए, ‘त्यहीबेला एक्कासी काउलीको प्रसंग निस्कियो। मेरो मुखमा त्यसै ‘ए काउली, नचिने मान्छे आँखा झिम्काउली’ शब्द फुर्‍यो। त्यसपछि यसले गीतको स्वरुप पाएको हो। ’

गीत पारिवारिक र साँस्कृतिक कार्यक्रमतिर नाच्न मिल्ने बनेको बताउँछन् आचार्य। ‘बिहे ब्रतबन्धतिर उफ्रीउफ्री नाच्न मिल्ने गीत बनेको छ, रमाइलो लाग्यो भने दर्शकहरु पनि उफ्रीउफ्री नाच्न सक्नुहुनेछ,’ उनले भने।

यो गीतको श्यामश्वेत रसाईलीले एरेन्ज र गम्भीर विष्टले भिडियो कोरियोग्राफी गरेका हुन्।