बसको ठक्करले स्कुटर चालकको मृत्यु, स्थानीयले लगाए बसमा आगो

मोरङ- पूर्व-पश्चिम राजमार्ग अन्तर्गत मोरङको उर्लाबारी-३ नयाँ मंगलबारेमा बिहीबार दिउँसो यात्रुवाहक बसले स्कुटरमा सवार यात्रुलाई ठक्कर दिँदा उनको घटनास्थलमै मृत्यु भएपछि स्थानीयवासीले बसमा आगजनी गरेका छन्।

पश्चिमबाट पूर्व गइरहेको मे १ ख ३०७३ नम्बरको बसले बिहीबार दिउँसो विपरीत दिशाबाट आइरहेको प्र-१-०१-०१३ प २९० नम्बरको स्कुटरलाई ठक्कर दिँदा झापाको कमल गाउँपालिका वडा नम्बर २ का ३४ वर्षीय पवन सुवेदीको घटनास्थलमै मृत्यु भएको थियो।

प्रहरीका अनुसार बसले स्कुटरलाई ठक्कर दिएको स्थानबाट मृतकको शरीर एक सय ३५ फिट पर उछिट्टिएको थियो भने स्कुटरलाई बसले घिसारेर २ सय ९५ फिट पर पुर्‍याएको थियो।

तीव्र गतिका कारण बसले स्कुटरलाई ठक्कर दिएको भन्दै आक्रोशित स्थानीयले बसमा आगजनी गरेका छन्। आगजनीबाट बसमा नराम्ररी क्षति पुगेको प्रहरीले जानकारी दिएको छ।