आइसिसीले श्रीलंकाबाट दक्षिण अफ्रिका सार्‍यो यू–१९ विश्वकप

काठमाडौँ – अन्तर्राष्ट्रिय क्रिकेट काउन्सिल (आइसिसी)ले यू–१९ विश्वकपको अधिकार श्रीलंकाबाट दक्षिण अफ्रिका सारेको छ। आइसिसीले श्रीलंका क्रिकेटलाई निलम्बन गरेसँगै श्रीलंकाबाट यू–१९ विश्वकपको आयोजनाको जिम्मेवारी खोस्न सक्ने चेतावनी दिएको थियो।

आगामी जनवरी र फेब्रुअरी हुने यू–१९ विश्वकप क्रिकेट अब दक्षिण अफ्रिकामा हुनेछ। आइसिसीको बोर्ड बैठकले सर्वसम्मत रुपमा विश्वकप श्रीलंकाबाट दक्षिण अफ्रिका सारेको हो। दक्षिण अफ्रिकामा यसअघि यू–१९ महिला विश्वकप २०२३ र यू–१९ विश्वकप २०२० आयोजना भएको थियो।

यसपटकको विश्वकपमा नेपालसहित १६ देशले सहभागिता जनाउँदै छन्। विश्वकपमा नेपाल समूह ‘डी’मा रहेर प्रतिस्पर्धा गर्दै छ। समूहमा नेपालसँगै पाकिस्तान, अफगानिस्तान र न्युजिल्यान्ड रहेका छन्।

यसअघि विश्वकपमा खराब प्रदर्शन गरेको भन्दै श्रीलंकाको सरकारले त्यहाँको क्रिकेट बोर्ड भंग गर्दै अन्तरिम बोर्ड गठन गरेसँगै आइसिसीले श्रीलंकालाई प्रतिबन्ध गरेको थियो।