वीरगञ्जमा म्याद गुज्रिएका बियर बिक्री वितरण

वीरगञ्ज – वीरगञ्ज महानगरपालिकाका विभिन्न मदिरा पसलमा म्याद गुज्रिएका बियर बिक्री वितरण भइरहेको पाइएको छ। महानगरमा रहेका मदिरा पसलमा अनुगमनको क्रममा म्याद गुज्रिएका बियर फेला परेपछि त्यस्ता बियरको बिक्री वितरण भइरहेको खुलेको छ।

साथै, थुप्रै मदिरा पसलले महानगरबाट व्यवसाय प्रमाणपत्र नलिएर सञ्चालन गरेको पनि पाइएको छ। बिहीबार र शुक्रबार दुई दिन महानगरको बजार अनुगमन समितिले मदिरा बिक्रेता पसलमा अनुगमन गर्दा म्याद गुज्रिएको बियर फेला परेको अनुगमनमा सहभागी उपभोक्ता हित संरक्षण मञ्च वीरगञ्जका अध्यक्ष अजित भुजेलले जानकारी दिए।

अनुगमनका क्रममा मुर्ली चौकस्थित रिया एन्ड अदिती इन्टरप्राइजेजमा म्याद गुज्रिएको बडबाइजर बियर ३३० एमएलको १४ थान बिक्री गर्न राखिएको, पानीट्यांकीमा रहेको रवि ट्रेडर्सबाट म्याद नाघेको नेपाल आइस बियर ६५० एमएलको एक थान, ३३० एमएलको दुई थान, ड्रेगन बियर ६५० एमएलको एक थान, बडबाइजर बियर ३३० एमएलको पाँच बोतल फेला परेको भुजेलले बताए। म्याद गुज्रिएका बियरलाई अनुगमन टोलीले नष्ट गरेको उनले बताए।

मंसिर २२, २०८० मा प्रकाशित
प्रतिक्रिया दिनुहोस्