बिर्तामोडको नगरपालिकाको बाख्रा साटासाट कार्यक्रम किसानमाझ लोकप्रिय बन्दै

झापा – झापाको बिर्तामोड नगरपालिका वडा नम्बर ८ स्थित साना किसान बाख्रा पालन कृषक समूहका सदस्यहरुले बाख्रा पालेर मनग्ये आम्दानी गर्न थालेका छन् ।

उनीहरूले बिर्तामोड नगरपालिकाको मेयर पकेट प्याकेज कार्यक्रम अन्तर्गत शुरु गरेको कार्यक्रमबाट राम्रो आम्दानी भइरहेको बताएका हुन् ।

नगरपालिकाको मेयर पकेट प्याकेज ग्रामिण बाख्रा साटासाट कार्यक्रम अन्तर्गत २०७४ सालमा समूहमा रहेका १५ जना सदस्यले ४४ वटा बाख्रा र एउटा बोका अनुदान प्राप्त गरेका थिए ।

पालिकाले उनीहरूलाई गोठ सुधारका लागि ३५ हजार रुपैयाँका दरले नगद अनुदानसमेत दिएको समूहकी सचिव कल्पना सिटौला कडरियाले बताइन् । तीन तीन वटा बाख्राबाट शुरु गरेको समूहका सदस्यहरुले अहिले दर्जनौँ बाख्रा पालन गरिरहेको उनले बताइन् ।

समूहले पालिकाबाट प्राप्त गरेको तीन तीन वटा बाख्राको पाठा अन्य समूहलाई हस्तान्तरण गरिसकेका छन् । समूहका सदस्यहरुले मासिक १ हजार रुपैँया बचत गर्ने गरेको र हाल २२ लाख बढी रकम बचत भएको सचिव कडरियाले बताइन् ।

सचिव कडरियाका अनुसार हितकोषमा २० रुपैयाँका दरले छुट्याउने गरेको र सो रकमसमेत हाल ३० हजार रुपैयाँको हाराहारीमा जम्मा भएको छ ।

समूहका सदस्यहरुले बाख्राका लागि आवश्यक प्राविधिक सहयोग पशु सेवा कार्यालयबाट उपलब्ध हुने गरेको कडरियाको भनाइ छ । कृषकहरुले ५० प्रतिशत अनुदानमा प्रत्येक बाख्राको बीमासमेत गर्ने गरेका छन् ।

बिर्तामोडको पशुपंछी तथा मत्स्य विकास शाखा प्रमुख साबित्रा दाहालले यो कार्यक्रमअन्तर्गत बाख्रा पालन गर्ने किसानहरुले लाभ लिइरहेको बताइन् ।

मेयर पकेट प्याकेज कार्यक्रम अन्तर्गत बाख्रा, कुखुरा र बंगुर पालन शुरु गरिएको भएपनि कुखुरा पालनलाई पछिल्लो समय निरन्तरता नदिइएको उनको भनाइ छ ।

बंगुरमा देखिएको अफ्रिकन स्वाइन फिभरका कारण व्यवसाय नै कमजोर हुँदै गएको दाहालले जानकारी दिइन् ।

नगरपालिकाले संदेश बंगुर पालन समूहलाई बंगुरको पाठा दिएर व्यवसाय शुरु गराएको थियो । किसानहरुलाई पाठापाठी, घाँसको बिउ साथै समय समयमा खोप समेत उपलब्ध गराउँदै आएको शाखा प्रमुख दाहालले जानकारी दिइन् ।

नगरपालिकाले अनुदान दिएका क्षेत्रमध्ये बाख्रा पालन गर्ने किसानहरु अत्यन्तै सन्तुष्ट रहेको नगर प्रमुख पवित्रा महतारा प्रसाईले बताइन् । बाख्रा पालनबाट आम्दानी हुन थालेपछि किसानले साना मसिना समस्या टार्न साहु खोज्नु नपर्ने भएको उनको भनाइ छ ।

विशेषगरी घरका महिलाहरूले समूह चलाउने र आम्दानी लिने भएपछि घर खर्चका लागि श्रीमानको मुख ताक्नु नपर्ने किसानहरूले बताएका छन् ।

किसानहरूले उत्पादन गरेको मासुको बजारीकरणमा भने केही समस्या भएको र त्यसका लागि पनि पालिकाले सहजीकरण गर्ने गरेको नगर प्रमुख प्रसाईंले जानकारी दिइन् ।

मंसिर २३, २०८० मा प्रकाशित
प्रतिक्रिया दिनुहोस्