खाद्यान्न तथा सुर्तीजन्य पदार्थसहित दुई जना पक्राउ

मोरङ – भारततर्फबाट अवैध रुपमा भित्रिएको ५ लाख रुपैयाँभन्दा बढी रकम बराबरको खाद्यान्न तथा सुर्तीजन्य पदार्थसहित दुई जनालाई प्रहरीले पक्राउ गरेको छ।

जिल्ला प्रहरी कार्यालय मोरङका अनुसार मोरङको रतुवामाई नगरपालिकाको झुर्कियामा भन्सार छली गरी भारतबाट भित्रिएको ५ लाख २६ हजार ३ सय ८० रुपैयाँ बराबरको खाद्यान्न तथा सुर्तीजन्य पदार्थ बरामद गरेको हो।

मोरङ प्रहरीका प्रवक्ता तथा प्रहरी नायब उपरीक्षक रञ्जनकुमार दाहालका अनुसार झुर्कियास्थित भित्री सडकखण्डमा राति करिब ८ बजे १–०१–००१ च८६८७ नम्बरको मारुती कारमा शंका लागेर जाँच गर्दा भन्सार छली गरिएको सामान बरामद भएको हो।

प्रवक्ता दाहालले सामानसहित कारचालक झापा दमकका ३८ वर्षीय सुरज थापा र ५० वर्षका कुमार राई पक्राउ परेको जानकारी दिए। पक्राउ परेका दुवै जनालाई आवश्यक कारबाहीका लागि भन्सार कार्यालय विराटनगरमा बुझाइएको प्रवक्ता दाहालले बताए।

मंसिर २४, २०८० मा प्रकाशित
प्रतिक्रिया दिनुहोस्