आहा रारा पोखरा गोल्डकप: पहिलो सेमिफाइनलमा जावलाखेल र थ्रीस्टार भिड्दै

पोखरा- आहा रारा पोखरा गोल्डकपमा बुधबार जावलाखेल युथ क्लब र थ्रीस्टार क्लब खेल्दैछन्।

पोखरामा जारी २३औं संस्करणको आहा रारा पोखरा गोल्डकपको पहिलो सेमिफाइनलमा जावलाखेल र थ्रीस्टार आमनेसामने हुन लागेका हुन्।

पोखरा रंगशालामा आज दिउँसो साढे २ बजे खेल हुनेछ। थ्रीस्टार र जावलाखेल आहा रारामा तेस्रोपटक आमनेसामने हुन लागेका हुन्।

२०६८ सालको क्वार्टरफाइनलमा यी दुई टोलीले पहिलोपटक मैदान साटेका थिए।पहिलोपटक सहभागी जावलाखेलले थ्रीस्टारलाई ३-१ ले पराजित गर्दै फाइनलसम्मको यात्रा गर्न सफल भयो।

लगत्तै ११औं संस्करणमा २०६९ सालमा सेमिफाइनलमा थ्रीस्टार र जावलाखेल दोस्रो पटक मैदान उत्रिए। थ्रीस्टारले २-१ गोल अन्तरले जावलाखेललाई पन्छ्याउँदै अघिल्लो संस्करणको हारको बदला लियो।

आजको तेस्रो भेटमा सफल एक टोलीले उपाधि यात्रा तय गर्नेछ। थ्रीस्टारले हालसम्म आहा राराको ५ पटक उपाधि रक्षा गरिसकेको छ। जावलाखेल भने अहिलेसम्म उपाधिविहिन छ।

क्वार्टरफाइनलमा थ्रीस्टारले पाहुना टोली भुटानको पारो एफसीलाई हराउँदै सेमिफाइनलमा पुगेको हो ।

जावलाखेलले मनाङ मर्स्याङ्दी क्लबलाई पराजित गर्दै सेमिफाइनलमा स्थान पक्का गरेको थियो।

माघ १७, २०८० मा प्रकाशित
प्रतिक्रिया दिनुहोस्