लागुऔषध खैरो हेरोइनसहित तीनजना पक्राउ

वीरगञ्ज- लागुऔषध खैरो हेरोइनसहित तीनजना वीरगञ्जबाट पक्राउ परेका छन्। पक्राउ पर्नेहरूमा पर्सा वीरगञ्ज महानगरपालिका वडा नं.१६ बस्ने राजबली महतो, सोही स्थानका मनोहर महतो र बाराको परवानीपुर गाउँपालिका-५ बस्ने अबधेशप्रसाद पटेल रहेका छन्।

प्रहरी चौकी बसपार्क तथा लागुऔषध नियन्त्रण ब्युरो शाखा कार्यालय, पर्साबाट खटिएको संयुक्त चेकिङ टोलीले वीरगञ्ज महानगरपालिका-१६ स्थित सडकखण्डमा तिनै जनालाइ चेकजाँचको क्रममा पक्राउ गरिएको पर्साका प्रहरी प्रवक्ता कुमार विक्रम थापाले जानकारी दिए।

पक्राउ परेका तीनैजनाको साथबाट एक-एक सय ग्राम गरी तीन सय ग्राम लागुऔषध खैरो हेरोइनजस्तो देखिने सेतो पदार्थ बरामद गरिएको उनले बताए। तीनैजना विरुद्ध लागुऔषध मुद्दामा कारवाही प्रक्रिया अघि बढाइएको थापाले बताए।

माघ १७, २०८० मा प्रकाशित
प्रतिक्रिया दिनुहोस्