‘चिहानमाथि महल बनाइरहेको मान्छे’ माथि दाङमा विमर्श

दाङ- कवि घनश्याम अस्तित्वको ‘चिहानमाथि महल बनाइरहेको मान्छे’ नामक कविता संग्रहको विषयमा विमर्श कार्यक्रम सम्पन्न भएको छ ।

उदाहरण समूहका अभियन्ता तथा कवि नवीन अभिलाषी सहजकर्ता भएको उक्त कार्यक्रममा साहित्यकारहरु हिरामणी दुखी, यज्ञबहादुर डाँगी र सरिता देवकोटा वक्ता थिए ।

कृतिका विषयमा विचार राख्ने सिलसिलामा साहित्यकार दुखीले साहित्यकारहरु प्रायः सत्ताको प्रतिपक्षमा हुने बताए । यो कृतिले साहित्यिक धर्म निर्वाह गरेको छ बताउँदै कृति भित्रका रचनाहरुले ‘चिहानमाथि महल बनाइरहेको मान्छे’लाई आलोचनात्मक यथार्थवादको जगमा उभ्याएको उनले बताएका हुन् ।

त्यसैगरी अर्का वक्ता साहित्यकार डाँगीले यो कृतिमा संग्रहित कविताहरुले प्रतिक र विम्बको प्रयोग नवीन ढंगले गरेको विचार व्यक्त गरे । फुटकर कविताहरु पढेको स्मरण गर्दै पुस्तक यो स्तरको होला भन्ने लागेको नलागेको तर यसको स्तरीयताबाट आफू प्रभावित भएको बताए ।

त्यसैगरी साहित्यकार देवकोटाले कृति विद्रोहात्मक चेतले भरिभराउ भएको र नेपाली समाजको यथार्थ चित्रण गरेको बताएका हुन् ।

कार्यक्रममा दाङस्थित कवि एवम् साहित्यकारको उपस्थिति थियो ।

माघ २१, २०८० मा प्रकाशित
प्रतिक्रिया दिनुहोस्