पार्टीका सांसदहरुलाई ओलीको निर्देशनः संसदमा गलत बोल्नेको विरोध गर्नुस्

फाइल

काठमाडौँ – प्रमुख प्रतिपक्ष दल नेकपा (एमाले) का अध्यक्ष एवं संसदीय दलका नेता केपी शर्मा ओलीले संसदको रेकर्डबाट ‘शब्द हटाइयोस्’ भन्ने माग नगर्न पार्टीका सांसदहरुलाई निर्देशन दिएका छन्।

अध्यक्ष ओलीले संसदमा गल्ती बोल्नेहरुका शब्दले उसको परिचय दिने भएको भन्दै यस्ता शब्द हटाउन लगाउनु जरुरी नभएकोतर्फ पार्टीका सांसदहरुलाई सचेत गराए।

आइतबार पार्टी संसदीय दलको बैठक समापन गर्दै उनले संसदमा गलत कुराको सख्त आलोचना र विरोध गर्न पनि पार्टीका सांसदहरुको ध्यानाकर्षण गराए।

गल्ती बोल्नेका कुरा संसदमा विरोध गरे पुग्ने भएकाले यसलाई रेकर्डबाट हटाउन माग गर्न आवश्यक नभएको ओलीको भनाइ थियो। अध्यक्ष ओलीले संसदमा गल्ती बोल्नेले त्यसलाई रेकर्डबाट हटाइपाउँ भन्नु स्वभाविक हुने भए पनि अरुले उसको गल्ती सच्याइदिने काम गरिरहन नपर्ने बताए।

सांसदले सदनमा बोलेका कुनै शब्द वा अभिव्यक्ति संसदीय मर्यादामा आँच पुग्ने किसिमको भएमा त्यसलाई संसदको रेकर्डबाट हटाउनका लागि सभामुखले निर्देशन दिने व्यवस्था छ। ओलीले त्यस्ता शब्द वा अभिव्यक्ति दिने सांसद आफैले त्यसलाई हटाउन माग गर्नु उपयुक्त हुने पनि स्पष्ट पारे।

माघ २१, २०८० मा प्रकाशित
प्रतिक्रिया दिनुहोस्