दक्षिण कोरियालाई स्तब्ध पार्दै जोर्डन एसियन कप फुटबलको फाइनलमा

उपाधि दाबेदार दक्षिण कोरियालाई स्तब्ध पार्दै जोर्डन एसियन कप फुटबलको फाइनलमा प्रवेश गरेको छ। मंगलबार राति भएको खेलमा जोर्डनले दक्षिण कोरियालाई २-० ले पराजित गर्दै सनसनिपूर्ण रुपमा पहिलो पटक फाइनलमा स्थान बनायो। पहिलो हाफ गोलरहित बराबरी भएको खेलमा जोर्डनले दोस्रो हाफमा बनाएको २ गोलको अग्रता फाइनल प्रवेशका लागि पर्याप्त बन्यो।

खेलको ५३औं मिनेटमा जोर्डनले सुरुवाती अग्रता बनाएको थियो। मूसा अल तामरीको पासमा याजान अल नैमातले आकर्षक चिप मार्फत जोर्डनलाई अग्रता दिलाएका थिए। ६६औं मिनेटमा जोर्डनले अग्रता दोब्बर बनायो। यो पटक अल तमारीले आफ्नो उत्कृष्ट एकल प्रयासमा गोल गर्दा दक्षिण कोरिया निरास बनेको थियो।

प्रतियोगितामा जोर्डन र दक्षिण कोरिया एकै समूहमा रहेका थिए। सो समूहमा दक्षिण कोरिया दोस्रो र जोर्डन तेस्रो रहँदै नकआउटमा प्रवेश गरेका थिए। समूह चरणमा जोर्डन र दक्षिण कोरियाले २-२ गोलको बराबरी खेलेका थिए।

जोर्डनले अन्तिम १६ मा इराक र क्वाटरफाइनलमा ताजिकिस्तानलाई हराउदै पहिलो पटक सेमिफाइनलको यात्रा तय गरेको थियो। जोर्डनले अब फाइनलमा कतार र इरान बीच बुधबार हुने दोस्रो सेमिफाइनलको विजेतासँग उपाधिका लागि शनिबार प्रतिस्पर्धा गर्ने छ।

माघ २३, २०८० मा प्रकाशित
प्रतिक्रिया दिनुहोस्