विराटनगर- विराटनगरको महेन्द्र मोरङ आदर्श बहुमुखी क्याम्पसको स्वतन्त्र विद्यार्थी युनियनको सभापतिमा ४३ मतको अन्तरले अखिल क्रान्तिकारीका रोहित यादव विजयी भएका छन्।
विद्यार्थी राजनीतिको उद्गमस्थलको रुपमा परिचित क्याम्पसमा विजयी भएका यादवले १ हजार १ सय १८ मत हासिल गर्दै सभापतिमा जित हासिल गरेका हुन् ।
निर्वाचनमा नेविसंघका प्रज्वलजंग विष्टले १ हजार ७५ मतसहित दोस्रो स्थानमा छन्। त्यसैगरी, एमाले अनेरास्ववियुका अनिश बोगटी २ सय ३२ मतसहित तेस्रो स्थानमा भए ।
सभापति गुमाएको नेविसंघले सचिव र कोषाध्यक्षमा भने जित हासिल गरेको छ । सचिवमा नेविसंघका सुदिक्षा थापा मगरले ७ सय ४१ मतसहित जित हात पारिन् ।
मगरभन्दा १ सय ५३ मतले पछि परेको समाजवादी विद्यार्थी युनियन नेपालका राकेशकुमार यादवले ५ सय ८८ मत पाएका छन् ।
त्यसैगरी, कोषाध्यक्षमा नेविसंघका रोशनकुमार पासवानले ६६ मतको अन्तरले विजयी भए। पासवानले ८ सय ९३ मतहासिल गरिरहँदा प्रतिस्पर्धी अखिल क्रान्तिकारीका राजिव यादवले ८ सय २७ मत पाए ।
एमालेतर्फबाट अनेरास्ववियुका मन्दिप पोखरेलले ५ सय ८१ मत पाएका छन् । यद्यपि, सदस्यतर्फ नेविसंघका मोहम्मद साहिन, कौशलकुमार साह, सुशान्त बस्नेत, नविनबाबु तिवारी, रक्षक सुवेदी, एन्जिला काफ्ले, रामदत्त कुमार मेहता विजयी भए ।
सदस्यतर्फ क्रान्तिकारीका गौतमकुमार मण्डल विजयी भएका छन् । मंगलबार सम्पन्न निर्वाचनमा ५ हजार ९ सय ८४ मतमध्ये २ हजार ६ सय ३१ मत खसेको थियो ।
महेन्द्र मोरङसँगै विराटनगरको तीनवटा आंगिक क्याम्पसतर्फ स्नात्तकोत्तरमा प्रितम साह प्यानलसहित र विराटनगर नर्सिंग क्याम्पसमा रोहित ताजपुरिया विजयी भएका छन् ।
भर्खरै
लोकप्रिय
