- मुम्बईमा सम्पन्न वार्षिक साधारण सभापछि मिथुन मनहासलाई बिसिसिआईका अध्यक्षमा सर्वसम्मति निर्वाचित गरिएको हो।
- राष्ट्रिय टोलीमा स्थान नपाए पनि दिल्लीको प्रथम श्रेणी क्रिकेटमा मनहासले शानदार प्रदर्शन गरेका थिए।
- मनहासको उदयलाई सत्तारूढ भारतीय जनता पार्टीको विशेष समर्थन रहेको बताइएको छ।
भारतका पूर्व घरेलु क्रिकेटर तथा प्रशासक मिथुन मनहास आइतबार भारतीय क्रिकेट नियन्त्रण बोर्ड (बिसिसिआई) का नयाँ अध्यक्षमा सर्वसम्मतिले निर्वाचित भएका छन्।
मुम्बईमा सम्पन्न बोर्डको वार्षिक साधारण सभापछि मनहासलाई औपचारिक रूपमा अध्यक्ष घोषणा गरिएको हो। उनले ७० वर्षको अनिवार्य सेवानिवृत्तिमा पुगेका रोजर बिन्नीलाई प्रतिस्थापन गर्नुभएको हो। उपाध्यक्षमा राजीव शुक्ला र सचिवमा देवजित साइकिया निर्वाचित भएका छन्।
४५ वर्षीय मनहासले भारतका लागि अन्तर्राष्ट्रिय क्रिकेट खेलेका थिएनन्। तर दिल्लीको तर्फबाट खेल्दा उनले १५७ प्रथम श्रेणी म्याचमा ४५।८२ औसतसहित नौ हजार ७१४ रन बनाएका थिए।
उनको समय भारतीय महान खेलाडीहरू सचिन तेन्दुलकर, राहुल द्रविड, सौरभ गाङ्गुली र भिभिएस लक्ष्मणको युगसँग मेल खाएको थियो। त्यसैले राष्ट्रिय टोलीमा प्रवेश गर्ने मौका सीमित रह्यो। दिल्ली टोलीमा समेत उनी वीरेन्द्र सेहवाग र गौतम गम्भीरको छायाँमा पर्नुभयो, तर ती दुई स्टार प्रायः राष्ट्रिय कर्तव्यमा व्यस्त हुने भएकाले मनहासले धेरै पटक टोलीको नेतृत्व गरे।
इन्डियन प्रिमियर लिग (आइपिएल) मा उनले ५० भन्दा बढी खेल खेले। खेल जीवनपछि भने उनी क्रिकेट प्रशासनमा चम्किनुभयो। उहाँले विशेषगरी जम्मु र काश्मीर क्रिकेट सङ्घको निर्देशक रहँदा आधारभूत स्तरको विकासमा योगदान दिए।
भारतमा क्रिकेटको अपार लोकप्रियताले बिसिसिआईलाई प्रायोजन र टेलिभिजन सम्झौताबाट विश्वकै धनी खेल निकाय बनाएको छ। यस शक्तिशाली बोर्डको नेतृत्वमा मनहासको उदयलाई सत्तारूढ भारतीय जनता पार्टी (भाजपा) को स्पष्ट समर्थन रहेको बताइन्छ।
गत हप्तामात्र नयाँदिल्लीमा गृहमन्त्री अमित शाहको निवासमा भएको महत्त्वपूर्ण बैठकमा उनलाई उम्मेदवारका रूपमा छनोट गरिएको भारतीय सञ्चारमाध्यमले जनाएका छन्। अमित शाह अन्तर्राष्ट्रिय क्रिकेट काउन्सिल (आइसिसी) का प्रमुख जय शाहका पिता पनि हुन्।
मनहासको निर्वाचनले भारतीय क्रिकेटमा नयाँ प्रशासनिक अध्याय सुरु भएको मानिएको छ।
भर्खरै
लोकप्रिय
