- कञ्चनपुरमा विपद्जन्य घटनाबाट जनधनको ठूलो क्षति हुँदै, आगलागी र करेन्टबाट घर तथा चौपाया नष्ट भएका छन्।
- करेन्ट र सर्पदंशबाट जनधनको क्षति भई, करेन्टले तीन जनाको मृत्यु र सर्पदंशले ३१ जना घाइते भएका छन्।
- बाढी तथा जङ्गली जनावर आक्रमणबाट करिब रु १४ लाख ५५ हजार बराबरको क्षति पुगेको जानकारी प्राप्त भएको छ।
कञ्चनपुर- कञ्चनपुरमा चालु आर्थिक वर्षको हालसम्म विभिन्न विपद्जन्य घटनाबाट जनधनमा ठूलो क्षति पुगेको छ ।
आगलागी, करेन्ट, सर्पदंश र जङ्गली जनावरको आक्रमण तथा बाढीजन्य विपद्ले जिल्लावासीलाई ठूलो मार परेको छ ।
जिल्ला प्रहरी कार्यालय कञ्चनपुरका प्रहरी नायब उपरीक्षक सागर बोहराका अनुसार आगलागीबाट हालसम्म तीन घर पूर्ण रूपमा र पाँच घर आंशिक रूपमा जलेका छन् ।
घरभित्रका बहुमूल्य सामान, महत्त्वपूर्ण कागजात र भण्डारण गरिएको अन्न जलेर नष्ट हुँदा करिब रु २२ लाख ३२ हजार बराबरको क्षति भएको छ । सो क्रममा एक चौपायाको मृत्यु र १२ चौपाया घाइते भएका छन् ।
त्यस्तै, करेन्ट लागेर तीन जनाको मृत्यु, पाँच जना घाइते र एउटा भैँसीको मृत्यु भएको छ । सर्पदंशका कारण एक जनाको ज्यान गइसकेको छ भने ३१ जना घाइते भएका छन् ।
जङ्गली जनावरको आक्रमणबाट तीन जना घाइते भएका छन् । तीमध्ये दुई जना बाघको आक्रमण र एक जना हात्तीको आक्रमणमा परेका हुन् ।
यसैगरी १० चौपाया मारिएका, एक चौपाया घाइते भएका र २० भन्दा बढी घर आंशिक क्षतिग्रस्त भएका छन् । यसरी जनावर आक्रमणबाट मात्र करिब रु १० लाख १० हजार बराबरको क्षति भएको छ ।
यसैगरी नदीमा डुबेर दुई जनाको मृत्यु, तीन जना बेपत्ता र एक चौपायाको मृत्यु भएको छ । बाढीबाट चार घर पूर्ण क्षति र ६३ घरमा पानी पसेर सामान्य क्षति पुगेको छ ।
यसरी वर्षाजन्य विपद्ले करिब रु चार लाख ४५ हजार बराबरको क्षति पुर्याएको प्रहरी नायब उपरीक्षक बोहराले जानकारी दिए ।
भर्खरै
लोकप्रिय
