- अविरल वर्षापछि कोशी प्रदेशमा बाढी–पहिरोको प्रकोपले हालसम्म २६ जनाको ज्यान गएको छ।
- इलाममा २३, उदयपुर, खोटाङ र पाँचथरमा समान एक जनाको मृत्यु भएको कोशी प्रहरी कार्यालयले जनाएको छ।
- पहिरोमा परी र बाढीबाट ५३५ जनालाई सकुशल उद्धार गरिएको कोशी प्रहरी कार्यालय विराटनगरले जानकारी दियो।
मोरङ – अविरल वर्षापछि कोशी प्रदेशको विभिन्न स्थानमा गएको बाढी–पहिरोमा परी हालसम्म २६ जनाको मृत्यु भएको छ।
कोशी प्रदेश प्रहरी कार्यालयका अनुसार इलाममा २३, उदयपुर, खोटाङ र पाँचथरमा समान एक जनाको मृत्यु भएको हो।
कोशी प्रदेशका प्रहरी वरिष्ठ उपरीक्षक तथा प्रवक्ता दीपक पोखरेलका अनुसार शनिबार र आइतबार पहिरो, बाढी र खोलाले बगाउँदा २६ जनाको मृत्यु भएको छ।
अविरल वर्षासँगै इलाममा पहिरोमा परी ठूलो संख्यामा मानवीय क्षति पुगेको छ। दोलखा जिल्ला घर भएका एकैपरिवार दीप बस्नेत, भवानी बस्नेत र १२ वर्षीया दिब्या बस्नेतसहित पाँच जनाको सूर्योदय नगरपालिकामा मृत्यु भएको छ।
त्यसैगरी, इलाम नगरपालिका वडा नम्बर ६, ७, ८, मांगसेबुंग गाउँपालिका, देउमाई नगरपालिका, फाकफोकथुम गाउँपालिकामा २१ जनाको पहिरोमा पुरिएर र उदयपुरको बेलका नगरपालिकामा ३८ वर्षीया मञ्जु अधिकारीको बाढीमा परी मृत्यु भएको छ।
खोटाङस्थित दिक्तेल रुपाकोट मझुवागढी नगरपालिकामा २१ वर्षीय सुमन विक, पाँचथर तुम्बेवा गाँउपालिकामा ७९ वर्षीया बृद्धा कान्छीमाया शेर्माको पहिरोमा परी मृत्यु भएको छ।
यससँगै पहिरोमा परी र बाढीबाट प्रदेशभर ५ सय ३५ जनालाई सकुशल उद्धार गरेको कोशी प्रहरी कार्यालय विराटनगरले जनाएको छ।
भर्खरै
लोकप्रिय
